Sekretari i Përgjithshëm Gazment Bardhi ka reaguar pas deklaratës së ministres së Shtetit për Marrëdhëniet me Parlamentin, Elisa Spiropali për kallëzimin në SPAK nga ana e Partisë Demokratike.
Më herët Spiropali tha se PS shkon për të takuar qytetarët në të gjithë Shqipërinë, ndërsa anëtarët e PD presin që qytetarët të shkojnë e t’i takojnë ata.
Ndërkohë, Bardhi shprehet përmes një postimi në rrjetet sociale se dështimi i qeverisë e ka bërë nervoze ministren Spiropali. Bardhit thotë se SPAK ka “punë” me ministren para dhe pas zgjedhjeve të 25 prillit.
Sipas zyrtarit të PD, anëtarët e PS “do të japin llogari për thirrjen me dhunë të administratës në takimet e PS, përdorimin e lejeve të legalizimit apo procesit të rindërtimit për qëllime elektorale, si dhe për abuzimin me pushtetin dhe paratë që u kanë vjedhur shqiptarëve këto 8 vjet.”
LEXO EDHE: Kallëzimi në SPAK, Spiropali-PD: Ne shkojmë tek qytetarët, jo ata tek ne
Reagimi
Dështimi i Edi Ramës në 8 vite dhe humbja e pushtetit është arsyeja e nervozizmit të Elisa Spiropalit!
Ka të drejtë që nervozohet! SPAK ka punë me të PARA dhe PAS ZGJEDHJEVE TË 25 PRILLIT. Elisa Spiropali, Edi Rama dhe çeta e tij janë në shkelje të ligjit. Ata do të japin llogari për thirrjen me dhunë të administratës në takimet e PS, përdorimin e lejeve të legalizimit apo procesit të rindërtimit për qëllime elektorale, si dhe për abuzimin me pushtetin dhe paratë që u kanë vjedhur shqiptarëve këto 8 vjet.
Elisa Spiropali e di se gjuha e padenjë në facebook dhe hetimi nga SPAK janë dy gjëra të ndryshme, prandaj është nervoze.
Kjo kohë e vështirë i ka bindur shqiptarët se politikanë si Edi Rama apo Elisa Spiropali mendojnë vetëm për vete, duke vrarë shpresën dhe mundësitë për shqiptarët. Kjo është arsyeja pse të rinjtë braktisin vendin, pse ekonomia është në krizë, pse shëndetësia është në kolaps, pse numri i të papaunëve është rritur. Njerëzit nuk duan të jetojnë në një kënetë, ku mbyten nga pak çdo ditë. Njerëzit duan ndryshim dhe PD është gati për ndryshimin!/ Opinion.al
