Qendra e Shërbimeve Arsimore ka publikuar datën se kur mjekët, farmacistët, stomatologët dhe ekspertët e Shëndetit Publik do të japin provimin e licensës.
Sipas QSHA, provimi nuk do të kryehet këtë vit. Të rinjët që janë në pritje të marrjes së licensës do të kenë mundëi të japin provimin duke filluar nga java e dytë e muajit janar 2021.
“Për të gjithë kandidatët aplikantë për provimin e shtetit në sezonin e 19-të Mjekësi, ju bëjmë me dije se provimet do të zhvillohen duke filluar nga java e dytë e muajit janar 2021. Kalendari dhe listat emërore me oraret përkatëse për çdo kandidat do të publikohen në ditët në vijim në faqen zyrtare të Qendrës së Shërbimeve Arsimore”, njofton QSHA-ja.
Veç mjekëve, farmacistëve edhe stomatologëve në këtë minisezon do të futen në provim gjithashtu edhe infermierët, mamitë, fizioterapeutët, logopedët dhe teknikët e imazherisë së laboratorit.
Për të penguar përhapjen e COVID-19, QSHA ka hartuar nje plan masash se si mjekët e ardhshëm do të zhvillojnë provimin.
TESTIMET
Për të penguar përhapjen e COVID-19, të gjithë ata që do të gjejnë emrin në listat e publikuara nga QSHA-ja, nevojitet që veç dokumenteve bazë: dy diplomat (Bachelor e Master), letërnjoftim bashkë me një kopje të saj si dhe fatura e arkëtimit bazuar në herën e pjesëmarrjes në test, kandidatët për mjekë duhet të kenë me vete edhe maskë e doreza .
Ndërsa për pjesën përgatitore, për secilin nga profesionet ka teste të gatshme në një aplikacion brenda faqes së QSHA-së, përmes të cilit mund të ushtrohet përpara datës së caktuar. Specialistët kanë hartuar një fond me tre mijë pyetje, nga të cilat përzgjidhet automatikisht testi final. Për të rezultuar kalues, nevojitet që kandidati për mjek t’u përgjigjet saktë së paku gjysmës së pyetjeve.
Në mos herën e parë, ka mundësi të pafundme për të siguruar licencën e ushtrimit të profesionit.
Nuk janë më pesë limitet e pjesëmarrjes. Me një udhëzim të ri, qeveria zgjeron mundësitë për kandidatët. E vetmja gjë që nuk ka ndryshuar është tarifa në rritje për çdo herë që kandidatët futen në provim.
