Shqipëria dhe Kosova do të kenë një hapësirë të përbashkët konsullore në Strugë. Kështu ka njoftuar Ministri i Jashtëm në Detyrë, Gent Cakaj përmes një postimi në “Facebook”.
Cakaj, ka konfirmuar gjithashtu se është nënshkruar marrëveshja me ministren e Jashtme të Kosovës, Meliza Haradinaj-Stublla. Sipas ministrit në detyrë sado simbolik të jetë ky vendim, është një dëshmi se zbatimi i projektit të shfrytëzimit të përbashkët të hapësirave të ambasadave apo konsullatave mes Kosovës e Shqipërisë po vazhdon.
“Tashmë jemi marrë vesh zyrtarisht për bashkim të hapësirave të Konsullatave të Përgjithshme të dy vendeve tona në qytetin e Strugës. Sado simbolik të duket ky veprim, është megjithatë një dëshmi e prekshme, se zbatimi i projektit të shfrytëzimit të përbashkët të hapësirave të ambasadave a konsullatave mes Kosovës e Shqipërisë po vazhdon. Ky projekt duhet të vazhdojë me çdo kusht në çdo vend ku ka mundësi objektive” – shkruan Cakaj në “Facebook”.
Sipas Gent Cakajt, një tjetër marrëveshje e rëndësisë së vençantë është edhe ajo e nënshkruar nga partitë politike shqiptare të Luginës së Preshevës, për të vepruar si një forcë e vetme në Medvegjë.
“Nga ana tjetër, edhe marrëveshja e nënshkruar nga partitë politike shqiptare të Luginës së Preshevës, për të vepruar si një forcë e vetme në Medvegjë mbart një rëndësi të veçantë. Deri sa të ketë unitet e mobilizim të brendshëm, edhe angazhimi ynë kundër procesit të fshirjes së adresave do të bëhet më i fuqishëm. S’ka fjalë, ndërkaq, se ne do të vazhdojmë përpjekjen tonë për të shtuar mbështetjen politike dhe institucionale, veçanërisht për shqiptarët në Medvegjë, Bujanoc dhe Preshevë”-përfundon Ministri i Jashtëm në Detyrë Gent Cakaj./ Opinion.al
