Pas vendimit të Gjykatës së Korçës për shfuqizimin e masës disiplinore për Zani Çaushin, ka ardhur edhe reagimi i ish-kryeministrit Berisha.
Në një status në Facebook, Berisha shkruan se Zani Çaushi, i dënuari me burgim të përjetshëm, do të përfitojë nga lirimi me kusht pasi ka mbështetje të një deputeti.
“Zani ka te drejte qe kerkon lirimin:
1-Ai eshte bandit i partise.
2-Ai u tradhetua sepse vertet vrau e vrau, plackiti dhe perdhunoi sa deshi ne Vlore por me urdher dhe per interesa te Partise.
3-Zani me kollaro shik, mentori i tij kryesoi parlamentin dhe tani akademine nderkohe qe ai dergjet ne burg. Padrejtesi!.
4- Zani nuk vrau kater oficere policie dhe nuk mori 4 denime me vdekje siç vrau Dritan Dajti qe me angazhimin e Edi Rames arriti te heqe te katerta dhe pritet te lere burgun.
5- Zgjedhjet erdhen, Zani me mbeshtetjen e narkodeputetit te ben zap e sterzap Çolen e Vloren!”, shkruan Berisha.
Burime nga ABC News, bëjnë me dije se Gjykata e Korçës vendosi që të shfuqizonte masën disiplinore për Zani Caushin, që iu vendos në muajin prill të këtij viti nga burgu i Drenovës. Edhe pse nuk dihet se përse iu vendos kjo masë disiplinore, e cila më herët e komprometonte kërkesën e Zani Çaushit për të kërkuar lirimin me kusht.
Pikërisht këtë ‘njollë’ disiplinore Zani Çaushi e pastroi pasi gjykata e Korçës, në seancën e zhvilluar ditën e martë e shfuqizoi vendimin e autoriteteve të burgut të Drenovës. Kjo e fundit pasi ka pranuar kërkesën ka dhënë vendim për shfuqizimin e vendimit të këshillit disiplinor të burgut.
Pas dështimit në muajin korrik 2020 për të përfituar lirimin me kusht, Myrteza Çaushi në muajin shtator, iu kthye sërish proceseve gjyqësore. Myrteza Çaushi, ose siç njihet ndryshe si “Zani i Vlorës” në 29 shtator 2020 iu drejtua sërish me një kërkesë gjykatës së Korçës, duke kërkuar nga kjo e fundit që ti përllogarisë saktësisht, ditët e vuajtjes së dënimit, duke filluar nga momenti i arrestimit fillestar e deri në këtë periudhë, ku Myrteza Çaushi, ndodhet në burgun e Drenovës.
Aktualisht çështja është regjistruar në gjykatën e Korçës dhe gjyqtar për gjykimin e kësaj kërkese është Ervin Sulaj. Çaushi pretendon se ka shlyer pjesën më të madhe të dënimit pasi ai është dënuar me ligjin e kohës, me kushtin që të mos ketë marrë asnjë penalitet gjatë qëndrimit të tij në burg, teksa masa iu hoq duke i hapur rrugën për strategjinë e lirimit.
Edhe pala mbrojtëse e Zani Çaushit, njoftoi se klienti i tij ka të drejtën e paraqitjes së kërkesës së tij, për lirimin me kusht, sapo të ketë konkluduar në përllogaritjen e saktë të viteve të kryerjes së dënimit, e cila sipas tij e kalon afatin 25 vjet. /Opinion.al
