Sot në orën 11:00, Këshilli Politik për Reformën Zgjedhore do të mblidhet në Pallatin e Kongreseve për të diskutuar nismat e ndryshimeve kushtetuese të propozuara nga 28 deputetë të opozitës parlamentare të cilat kanë gjetur edhe mbështetjen e mazhorancës.
Ndryshimet e propozuara konsistojnë në riformulimin e nenit 64 dhe 68 të Kushtetutës. Konkretisht ato kërkojnë që të hiqen koalicionet parazgjedhore, hapjen e listave zgjedhore dhe vendosjen e një pragu kombëtar për subjektet zgjedhore.
Këto ndryshime kanë ringjallur debatin e ashpër politik mes Partisë Socialiste dhe opozitës jashtë parlamentare e cila akuzon të parën se po synon të vendosë kushte që favorizojnë atë duke prishur kështu edhe marrëveshjen e 5 qershorit.
Mazhoranca nga ana tjetër thotë se “5 qershori” nuk do të preket dhe se ajo po synon të arrijë një marrëveshje me opozitën parlamentare pasi këta të fundit nuk do të votojnë ndryshimet në Kodin Zgjedhor. Votat e tyre janë thelbësore pasi mazhoranca nuk ka 84 vota në Kuvend.
Ndërkombëtarët kanë bërë thirrje që të votohet sa më shpejtë marrëveshja e “5 qershorit” si një nga kushtet kyç për çeljen bisedimeve për negociatat. Sa i përket ndryshimeve kushtetuese atë kanë theksuar se adaptimi i tyre pa konsensus do të vërë në rrezik negociatat.
Pika që ka sjellë acarimin mes palëve është heqja e koalicioneve parazgjedhore. Opozita jashtëparlamentare e cilëson atë si një lëvizje të kryeministrit Rama për të favorizuar veten e tij dhe jashtë marrëveshjes së arritur.
Hapja e listave është një pikë tjetër që do të diskutohet sot. Ajo është kërkuar vazhdimisht nga deputetja Rudina Hajdari por nuk gjeti dakordësinë e palëve në Këshillin Politik.
Një nga pikat e tjera që diskutohet sot prek edhe pragun elektoral. Deputetët e opozitës parlamentare kërkuan fillimisht që pragu të ngrihej nga 3% që është aktualisht, në 5%, por më vonë e kërkuan 2%. Në zgjedhjet e fundit, pragun 3% e kaluan vetëm 3 parti politike: PS, PD dhe LSI.
Një ditë para se të mblidhej Këshilli Politik, ishanëtari i Gjykatës së Strasburgut, juristi Ledi Bianku, përmes një postimi në “Twitter” dha një arsye tjetër përse disa rregulla elektorale në Kushtetutë apo në ligjin zgjedhor nuk duhen prekur pa disa garanci. Bëhet fjalë për pragun elektoral, për të cilin Ledi Bianku sjell një vendim të Gjykatës së Strasburgut. Vendimi thotë qartë se pragu elektoral nuk mund të ndryshohet nëse nuk lejohen koalicionet dhe nëse vendi nuk ka një Gjykatë funksionale Kushtetuese.
“Për kujtesë, Këshillit Politik etj. – në Yumak dhe Sadak k. Turqisë, 2008, Gjykata e Strasburgut u shpreh se pragu elektoral mund të pranohet, por kur ka sisteme korrigjuese të tilla si koalicionet zgjedhore dhe kur ka garanci institucionale dhe procedurale – Gjykata Kushtetuese”, shkroi ish-anëtari i Gjykatës së Strasburgut në një postim në “Twitter”.
Pëveç Damian Gjiknurit, Oerd Bylykbashit, Petrit Vasilit dhe Rudina Hajdarit, në tryezën e sotme pritet të jetë edhe kryeministri Rama, Sekretari i Përgjithshëm i PD, Gazment Bardhi dhe kreu i grupit demokrat në Kuvend, Myslym Murrizi. /Opinion.al
