Ish-Kryetari i Bashkisë së Vorës Agim Kajmaku, i cili ndodhej në kërkim prej muajit nëntor ka rënë në prangat e policisë. Burime për Opinion.al bëjnë me dije se Kajmaku kishte shkuar në një spital privat ku ishte shtruar për probleme kardiake. Ka qenë pikërisht kjo lëvizje, që e ka zbuluar pëpara policisë, dhe ka çuar në arrestimin e tij ne ambjentet e spitalit.
“Ekzekutimi i vendimit penal është bërë në ambientet e një spitali privat në Tiranë, ku aktualisht ky shtetas po trajtohet me ndihmë të specializuar mjekësore”, njofton policia.
Ai ishte në kërkim që prej muajit nëntor, për emërime të paligjshme, pasi u zbulua se kishte genjyer në formularin e dekriminalizimit. Ish-kryebashkiaku socialist nuk deklaroi dënimin e tij në Greqi kur kandidoi në zgjedhjet vendore të qershorit 2019. Ai është akuzuar gjithashtu për falsifikim të vulës, falsifikim të dokumenteve zyrtare dhe vazhdim i detyrës pas dorëheqjes.
“Prokuroria e Rrethit Gjyqësor Tirane, ka shpallur në kërkim me masë sigurimi me arrest në burg, në lidhje me hetimin që zhvillohet në ngarkim të shtetasit Agim Kajmaku, i dyshuar për kryerjen e veprave penale, shpërdorim detyre, sipas nenit 248 te Kodit Penal, falsifikimi i formularëve, neni 190 i Kodit Penal, dhe Ushtrimi i funksioneve pas dhënies fund të detyrës, neni 249 i Kodit Penal”, thuhet në urdhër-arrestin për Kajmakun./Opinion.al
