Ministrja e Arsimit Besa Shanini ka vendosur të shtyjë zgjedhjet në universitete deri në momentin kur mund të sigurohet pjesëmarrje gjithëpërfshirëse e studentëve.
Përmes një postimi në rrjetet sociale, Shahini thotë se “Data e zgjedhjeve për organet drejtuese të IAL-ve shtyhet deri në një moment të dytë kur mund të sigurohet pjesëmarrje më gjithëpërfshirëse e studentëve”.
Nga ana tjetër ajo thotë se, procesi përgatitor i zgjedhjeve duhet të vazhdojë në mënyrë që IAL-të të jenë gati të fillojnë fushatën zgjedhore menjëherë pas shpalljes së datës.
“Procesi përgatitor i zgjedhjeve duhet të vazhdojë në mënyrë që IAL-të të jenë gati të fillojnë fushatën zgjedhore menjëherë pas shpalljes së datës. Shpresoj që ky urdhër të mundësojë kthimin e vëmendjes së udhëheqësve të arsimit të lartë publik tek planifikimi i mbylljes së suksesshme të vitit akademik për studentët”,- shprehet Shahini.
Zgjedhjet për drejtuesit e rinj të universiteteve publike u kthyen në një debat për shkak të pamundësisë së studentëve për të marrë pjesë në këto zgjedhje, pasi sipas urdhrit të mëhershëm të Ministrisë së Arsimit, fushata duhet të niste më 11 maj dhe zgjedhjet të mbahen më 12 qershor./ Opinion.al
