Gjimnazi “Sami Frashëri”, një nga shkollat më të vjetra dhe të njohura të kryeqytetit, ku kanë studiuar disa prej figurave më të rëndësishme në vend, do të rindërtohet pas dëmeve që pësoi nga tërmeti i 26 Nëntorit.
Pritet që shkolla e mesme, e ndërtuar fillimisht në vitet 60’, të zëvendësohet me një godinë më të madhe dhe t’i japë fund mësimit me 2 turne.
Kryetari i Bashkisë së Tiranës, Erion Veliaj, i cili është vetë një ish-nxënës i kësaj shkolle, u shpreh se ka komunikuar me shumë aktorë politikë që kanë studiuar aty, mes tyre presidenti Ilir Meta, ish-deputeti Dashamir Shehi, dhe ish-kryeministri Fatos Nano.
”Kam folur me Dash Shehin, presidentin Meta apo edhe Fatos Nanon që më tha një batutë që nuk e prisja. Ai në fakt është njohur gjithmonë për humor e më tha: Mjaft-i më prishi të gjitha planet në jetë, tani më prishi dhe shkollën”, u shpreh Veliaj./Opinion.al
