Pak ditë më parë kryeministri Edi Rama premtoi se Qeveria do të shpërblente 1000 euro stafin mjekësor që po përballet me koronavirusi.
Por, mësohet se Qeveria ka dhënë shpërblim 5 mijë lekë të reja për muajin mars dhe jo 1000 euro siç u premtua.
Kjo ka bërë që Personeli i urgjencës së spitalit rajonal të Lezhë të refuzojë shpërblimin prej 5 mijë lekë të reja, duke thënë që ato para të shkojnë për familjet në nevojë.
Ata kanë deklaruar gjithashtu se do të vazhdojnë të qëndrojnë në shërbim pasi situata është e vështirë. Përfaqësuesi i mjekëve dhe infermierëve në Spitalin Rajonal të Lezhës Rigels Cokaj deklaroi se pasi janë njohur dje me vendimin e shpërblimit ata kanë vendosur që të mos e marrin.
“Është një përfaqësi e urgjencës, gjithë stafi, jemi njohur më parë për vendimin e qeverisë në lidhje me shpërblimin që ka premtuar prej 1000 eurosh. Por dje jemi kemi mësuar nga Drejtoria e Spitalit se janë akorduar 5 mijë lek të reja për stafin mjekësor, dhe ne kemi vendosur që këto lek të kalojnë për familjet në nevojë. Spitali Rajonal i Lezhës ka qenë në gatishmëri, dhe do të vazhdojmë të jemi te gatshëm që të ndihmojmë të gjithë ata që kanë nevojë për ndihmë mjekësore. Shërbimi është bërë dhe do të vazhdojë të bëhet me të njëjtën devotshmëri”, deklaroi ai.
Mësohet se mjekët nuk kanë firmosur asnjë bordero ndërkohë që, nuk ka patur asnjë shpjegim apo reagim se përse ka ndodhur kjo situatë, apo përse është vendosur kjo shumë edhe pse është premtuar shpërblimi prej 1000 euro.
Sipas ABC Neës, në Spitalin Rajonal të Lezhës çdo ditë paraqiten pacientë që shfaqin shenja të Covid-19, ndërkohë që tamponët nuk bëhen për të gjithë, duke ekspozuar stafin mjekësor përballë rrezikut./ Opinion.al
