Presidenti i Shteteve të Bashkuara, Donald Trump, do të aktivizojë Gardën Kombëtare për të ndihmuar në ngritjen e qendrave mjekësore dhe shpërndarjen e qindrave tonelata me furnizime në Kaliforni, New York dhe Uashington, tre vendet e goditura më së shumti në SHBA nga shpërthimi i koronavirusit.
Në një konferencë për media nga Shtëpia e Bardhë, Trump tha se garda do të jetë në komandën e tre guvernatorëve, shtetet e të cilëve përbëjnë 58 për qind të rasteve me koronavirus në gjithë SHBA-në.
Disa guvernatorë, përfshirë atë të New Yorkut, Andrew Cuomo, i kanë kërkuar Shtëpisë së Bardhë që të kombinojë përpjekjet për sigurimin e furnizimeve mjekësore, duke thënë se shumica e udhëheqësve të 50 shteteve janë në garë kundër njëri-tjetrit për të blerë atë që është në dispozicion.
Në të gjithë SHBA-në deri më tani, janë mbi 33,000 raste të konfirmuara të të infektuarve me koronavirus, ndërsa mbi 400 pacientë kanë humbur jetën./Opinion.al
