Dr. Ramanan Laxminarayan, drejtor i Qendrës për Dinamikën e Sëmundjeve, Ekonomisë dhe Politikës ka paralajmëruar se India së shpejti mund të përballet me një “tsunami” rastesh me koronavirus.
Ai i tha BBC se nëse të njëjtat modele matematikore të aplikuara në SHBA ose në Mbretërinë e Bashkuar do të aplikoheshin në Indi, numri i të prekurve në vend do të shkonte në 300 milionë, nga të cilat rreth katër deri në pesë milion mund të ishin të rënda. India tashmë ka zbatuar një seri masash të gjera për të ngadalësuar përhapjen e virusit.
“Mendoj se padyshim India do të jetë qendra e radhës e shpërthimit të kësaj epidemie. Nuk ka të dhëna që tregojnë se shpërndarja e rasteve tek ne do të jetë e ndryshme nga pjesa tjetër e botës. Ndoshta tani jemi disa javë mbrapa vendeve të tjera por me shumë mundësi do të shohim të njejtin tsunami rastesh si në Itali dhe në Spanjë”, tha ai.
India për momentin numëron vetëm 207 raste me COVID-19 por Dr. Laxminarayan tha se kjo vjen për shkak të testimeve të pakta. “Kur numri i të testuarve do të rritet, atëherë do të konfirmohen edhe më shumë të prekur” shtoi ai.
Ai thesksoi se India ka vetëm tre javë kohë për tu përgatitur për shpërthimin e rasteve dhe nënvizoi si një nga problematikat kryesore mungesën e kushteve spitalore. Sipas tij India ka 70-100 mijë shtretër për ata që kërkojnë trajtim intensiv, një shifër e ulët kjo krahasuar me 4 ose 5 milionë që parashikohen se do të kenë nevojë. /Opinion.al
