Një operacion ndërkombëtar për goditjen e një rrjeti të trafikut të drogës është finalizuar me sukses.
Operacioni “Besa 2018” ka filluar në vitin 2018 dhe është organizuar dhe zhvilluar nga Policia italiane, në bashkëpunim me Policinë shqiptare, hungareze dhe atë turke.
Grupi kriminal në fokus të tij operonte në provincën e Bolzanos dhe në rajonin e Venetos në Itali.
Në Shqipëri, operacioni u drejtua nga Drejtoria Hetimore Qendrore, në bashkëpunim me Forcën e Posaçme Operacionale dhe DVP Vlorë.
Gjatë operacionit në Vlorë janë ushtruar disa kontrolle banesash dhe është ekzekutuar në ambientet e burgut, urdhri i ndalimit për shtetasin E. K, i cili ishte arrestuar në Vlorë në dhjetor 2019, për veprën penale “Prodhimi dhe shitja e narkotikëve”.
Në kuadër të këtij operacioni, gjatë dy vitesh hetime, janë arrestuar 12 persona në flagrancë, prej të cilëve 8 shqiptarë, 2 tunizianë, 1 zviceran e 1 italian, ndërkohë që 6 të tjerë, 4 italianë dhe 2 shqiptarë janë hetuar në gjendje të lirë. /Opinion.al
