Koreja e Jugut ka numrin më të ulët të lindjeve në botë dhe është një prej vendeve me jetëgjatësinë më të madhe, një kombinim aspak i zakonshëm dhe që parashikon një katastrofë demografike.
Vitin e shkuar, në një popullsi që numëron plot 51 milion banorë, kanë lindur vetëm 300.000 bebe, 7.3% më pak se në vitin 2018.
Sipas “CNN”, arsyeja kryesore duket se është kultura jo e shëndetshme e punës. Pavarsisht përpjekjeve, politikat sociale në vend nuk janë favorizuese dhe kjo e ka bërë shumë të vështirë për gratë që të gjejnë një balancë mes karrierës dhe jetës familjare.
Kështu, gratë koreano jugore po e refuzojnë gjithnjë e më shumë martesën dhe mëmësinë, për të shmangur ngarkesën e rëndë që lidhet me kujdesin e tyre dhe pengesave që dalin pas lindjes në lidhje me karrierën.
Për më tepër, nëse gratë mbesin shtatzënë, bëhet shumë e vështirë për to të gjejnë një punë, por edhe nëse e kanë një të tillë duhet të rikthehen aty menjëherë pas lindjes së bebit.
Megjithatë çështja bëhet më serioze pasi të rinjtë e Koresë së Jugut nuk e kanë kulturën e takimeve dhe njohjeve. Ata thonë se nuk kanë kohë, para apo kapacitet të mjaftueshëm emocional të dalin në takime. Kohën e lirë e shpenzojnë nëpër shkolla apo kurse për të fituar çertifikata apo aftësi të tjera profesionale.
Qeveria koreane ka shpenzuar më shumë se 148 miliardë dollarë që nga viti 2006 për të rritur numrin e lindjeve, por me këto ritme, pritet që popullsia të bjerë në 39 milionë banorë në 2067-ën dhe mosha mesatare do të jetë 62./Opinion.al
