Deputetja Rudina Hajdari ka denoncuar sot gjendjen e rënduar të grave në Shqipëri e cila sipas saj nuk i përputhet propagandës së qeverisë se roli i gruas është forcuar.
Nga foltorja e Kuvendit e cilësoi gjendjen si një emergjencë kombëtare pasi në 2 muaj janë vrarë 7 gra. Ndër të tjera deputetja tha se ka qenë edhe vetë pre e dhunës.
“Një gjyqtare u vra në mes të rrugës si një kafshë, ky Parlament nuk bëri asgjë, në 2 muaj janë vrarë 7 gra. Kjo është një emergjencë kombëtare! Gratë sot nuk janë të mbrojtura, gra e vajza dhunohen çdo ditë. Më vjen keq që sot flas ende për gra e vajza që vriten çdo ditë në rrugët e Tiranës. Ju sot c’po bëni? Reklamoni se roli i grave po rritet, ndërkohë që ato po vriten. A e kuptoni sot se ne jemi të gjitha viktima të këtij Parlamenti. Për mua është problem i thellë. Deklaroj para jush se edhe unë kam qënë pre dhe viktimë e dhunës. Nuk flas për dhunë psikologjike, jemi të gjithë viktima të këtij fenomeni edhe nëna ime kur jetonte në komunizëm edhe unë por fëmija im nuk duhet të jetë më viktimë e dhunës”, tha Hajadari.
Ajo foli gjithashtu për gjendjen e naftëtarëv të Ballshit të cilët kanë hyrë në grevë për rrogat e papaguara dhe kushtet e vështira financiara në të cilat kanë ngelur. Hajdari tha se i kishte vizituar vetë naftëtarët dhe ngriti pyetje se si ka mundësi që njerëzit që jetojnë dhe luftojnë mbi naftë nuk kanë lekë të ushqejnë fëmijët e tyre.
“Isha javën e kaluar në Ballsh, për të folur me naftëtarët që ishin në grevë për një javë të tërë që luftuan për pagat e tyre. Ata ndan historitë e tyre, ku treguan se punonin aty prej 20 vitesh. Shohim disa njerëz që ankohen, kështu jemi mësuar. Kjo qeveri i ka bezdi njerëzit e varfër dhe nuk do t’i dëgjojë problemet e tyre. Kur dëgjon historitë e tyre që të rrëqethin mishin. Gramozi shkonte çdo ditë dhe helmohej duke punuar mes naftës, e bënte për familjen e tij. Nuk i është siguruar këtyre naftëtarëve paga prej shumë kohësh Dhe një histori tjetër më goditi në zemër. Më tha se “kam djalin që studion në Tiranë dhe s’kam as 8 mijë leke të vjetra t’ja dërgoj”. Më tha; “i kam kërkuar borxh që t’ja dërgojë fëmijës tim në Tiranë”. Por pse po ndodh kjo gjë në Ballsh. Problemi i naftëtarëve nuk është problem i vetëm një qyteti, por i një vendi. Çfarë bën sot qeveria arrogante ? Ata kanë krijuar imunitetin, i shohin si njerëzit me histori normale dhe që ndodhin kudo. Por këto histori nuk janë historitë e kujtdo, por e vëllezërve tanë, e atyre zgjedhësve që ju kërkoni vota. Ju keni një qasje grabitqare, ndaj atyre njerëzve që janë bërë miliarderë. Kjo sallë është bërë grupi i miliarderëve. Si ka mundësi që sot këta njerëz jetojnë dhe luftojnë mbi naftë dhe nuk kanë lekë të ushqejnë fëmijët e tyre. Nuk kanë lekë të blejnë shpenzimet e familjes ë tyre. Ne jemi një vend me pasuri natyrore. Sot i vjedhin shqiptarët. E di ça ka ndryshuar sot? Ju jeni bërë më të pasur sot. Edi Rama shkoi në Ballsh dhe tha se do ndryshoje gjendja, dhe sot ata janë keq e më keq. Historia e naftëtarëve është historia e njerëzve të thjeshtë, që luftojnë për djersën e ballit,. Që i ka ardhur në majë të hundës nga një klasë politike punëtorësh të thjeshtë. Sa herë shkojnë i takojnë gjoja i dëgjojnë. Janë ata që do ta mbajnë gjallë këtë popull. Të gjitha këto mëkate do ju zënë.”, tha Hajdari. /Opinion.al
