Kryeministri Rama ka lëshuar deklarata të ashpra ndaj ish-kryeministrit të Kosovës Ramush Haradinaj dhe presidentit Ilir Meta.
Duke folur nga Moska, ku ndodhet në cilësinë e kreut të OSBE-së, Rama iu kthye edhe njëherë akuzave ndaj tij se ka qenë pjesë e një plani sipas të cilit marrëveshja mes Serbisë dhe Kosovës do të arrihet përmes ndryshimit të territoreve.
“Diskutimi absurd për ndarjen e Kosovës është një diskutim i përgatitur në një kuzhinë për të helmuar opinionin publik në emër të një atdhetarizmi të gënjyer. Disa heronjtë si Ramushi apo Iliri thjesht dhe vetëm shfrytëzojnë territore shpirtërore të atyre që janë të gatshëm ta marrin këtë helmim. Çdo marrëveshje e çfarëdolloj midis Beogradit dhe Prishtinës do të kalojë në shumë filtra dhe në fund fare filtrin e opinionit publik. Kjo që diku u mblodhën 2-3 veta për të ndarë një territor është përrallë banale një përrallë e treguar me ligësi dhe maskarallëk për të injektuar në shpirtin e vrarë të shumë njerëzve që kanë arsyet e tyre për të ushqyer një mllef ndaj atyre që kërkojnë të gjejnë një zgjidhje”, tha Rama.
Teksa komentoi kritikat në të shkuarën nga Moska drejt Partisë Socialiste për qëndrimin e saj për çështjet e rajonit të Ballkanit, Rama tha se kjo është një certifikatë “për t’ju përplasur në fytyrë atyre në Prishtinë, Shkup dhe Tiranë që bëjnë si patriotë që ose bëjnë pis në paqe statujën që i bënë vetes në luftë ose janë të paguar nga persona të tjerë të bëjnë këtë punë”. /Opinion.al
