Besimtarët e krishterë në të gjithë botën kremtojnë sot Krishtlindjet. Në katedralen e Shën Palit në Tiranë u mbajt edhe mesha e kësaj dite të shënuar të ngjalljes së Jezu Krishtit dhe që simbolizon paqe dhe dashuri.
Të pranishëm ishin edhe Presidenti Ilir Meta, kryetarja e LSI-së, Monika Kryemadhi, deputeti Tom Doshi dhe figura të tjera nga politika dhe fusha të tjera. Në meshë ishte edhe udhëheqësja e opozitës iraniane (MEK), Maryam Rajavi.
Meshën e drejtoi Imzot Xhorxh Frendo i cili vendosi theksin te solidariteti që treguan shqiptarët për të prekurit pas tërmetit tragjik të 26 Nëntorit.
“Çfarë po ndodh në këtë orë në kishat që janë plot me njerëz? Zakonisht në këtë orë njerëzit janë në gjumë apo disa të rinj në diskotekë, çfarë po ndodh që këta njerëz drejtohej drejt kishës? Kanë dëgjuar fjalën e engjëjve. Festa e Krishtlindjes është festa e plotë e solidaritetit. Solidar me ata që për shkak të tërmetit të 26 nëntorit kanë humbur gjithçka dhe kanë mbetur pa shtëpi. Jezusi që sot na mëson se çfarë do të thotë solidaritet, gëzohet duke parë solidaritetin që populli shqiptar ka treguar ndaj personave të prekur nga tërmeti. Vëllezërit dhe motrat shqiptare kanë treguar solidaritet dhe shumë u janë afruar personave që kanë mbetur pa shtëpi.”
Por, Imzot Frendo kishte edhe një apel për të gjithë ata që po përfitojnë nga ky moment tragjedie.
Solidariteti bën pjesë te ADN-ja shqiptare, e kanë të shkruar në ballin dhe zemrën e tyre. Sa bukur kjo shoqëri dëshmoi këtë solidaritet të jashtëzakonshëm, por kam një pyetje; a jemi të gjithë duke treguar këtë solidaritet ndaj viktimave të këtyre tragjedie? Jo, jam ndjerë shumë i zhgënjyer që dëgjova se ka disa që po abuzojnë, që kanë rritur qiratë, dhe për kë? Për njerëz që në këtë fatkeqësi kërkojnë një vendstrehimi, po rrisnin çmimet e materiale që duhen për ndërtimet, është mëkat i madh, të përfitojnë nga kjo tragjedi për të fituar. U drejtohem atyre që po pasurohen dhe korruptojnë në sajë të tërmetit. U drejtohem me fjalët; qani dhe vajtoni për të këqijat që do vijnë mbi ju” tha ai.
Në nisje të meshës, kryetarja e LSI-së u ka uruar të gjithë shqiptarëve gëzuar krishtlindjen. “Uroj që kjo mirësi të jetë për shqiptarët pafundësisht, gëzuar edhe ju Krishtlindjet, të bardha dhe të begata për familjet tuaja dhe të gjithë shqiptarët. Gëzuar për shumë vjet”
“Gëzuar Krishtlindjet të gjithëve, mbarësi” ishte edhe mesazhi i urimit të kreut të shtetit për shqiptarët. /Opinion.al
