Presidenca ka reaguar përsëri në lidhje me ngërçin e krijuar në Gjykatën Kushtetuese.
Zëdhënësi i Presidencës Tedi Blushi, shkruan në rrjetet sociale se presidenti Ilir Meta nuk ndalon asnjë ambasador të bëhet qesharak dhe karagjoz duke u futur në debate juridike, që sipas tij, nuk ekzistojnë.
Zëdhënësi i Presidencës, ironizon qëndrimin e diplomatëve, ndërsa thotë se askush nuk i ndalon ata që t’i drejtohen Komisionit të Venecias duke e pyetur se kush është me e rëndësishme, Kushtetuta e Shqipërisë, apo kreu i KED, Ardian Dvorani, të cilin ai e ka cilësuar si “Dvorani i Partisë”.
Po ashtu, në këtë reagim theksohet se Meta ka një pyetje për diplomatët; A i keni marrë leje Kryetarit të shtetit tuaj kur hyni në lojërat e grupit të strukturuar diplomatik për të diskutuar dekretet e Kryetarit të një shteti që e ka shpallur Pavarësinë që në vitin 1912?
Reagimi
Presidenti Meta nuk ndalon asnjë ambasador të bëhet qesharak dhe karagjoz duke hyrë në debate juridike që nuk ekzistojnë, pasi Kushtetuta dhe ligji për Gjykatën Kushtetuese e kanë të shkruar qartë dhe prerë se Presidenti s’mund të bëjë dy emërime të menjëhershme në Gjykatën Kushtetuese. Por Presidenti nuk i ndalon ata t’i drejtohen vetë Komisionit të Venecias e ta pyesin: Kush është me e rëndësishme, Kushtetuta e Shqipërisë apo Dvorani i Partisë? Ndërsa Presidenti ka një pyetje për këta dhunues të çdo norme diplomatike dhe Konvente: A i keni marrë leje Kryetarit të shtetit tuaj kur hyni në lojërat e grupit të strukturuar diplomatik për të diskutuar dekretet e Kryetarit të një shteti që e ka shpallur Pavarësinë që në vitin 1912?!./ Opinion.al
