Kryeministri i Izraelit, Netanjahu nuk do të dorëhiqet, pavarsisht akuzave nga Prokurori i Përgjithshëm për korrupsion, mashtrim dhe shpërdorim detyre për një seri ngjarjesh të ndara në tre çështje.
Më konkretisht pretendohet se kryeministri Netanyahu akuzohet se ka ndryshuar një ligj duke favorizuar biznesmenin Shaul Elovich, në këmbim të mbështetjes nga portali i tij Walla, më i ndjekuri në vend. Sipas prokurorisë, ndryshimi solli përfitime deri në 500 milionë dollarë për biznesmenin.
Në çështjen e dytë, Netanyahu akuzohet se ka përvetësuar qindra mijëra dollarë nga biznesmenë të ndryshëm afër tij, ndërsa në çështjen e tretë akuzohet se ka dëmtuar një gazetë rivale të së përditshmes Yediot Aharonot, në këmbim të një mbështetje për të dhe bashkëshorten.
Me tone të ashpra, Netanjahu akuzoi drejtësinë, policinë dhe faktorë të tjerë, se po organizonin një grusht shteti kundër tij.
“Nuk do të lejoj që gënjeshtra të triumfojë. Do të vazhdoj të drejtoj vendin siç e kërkon ligji”.
Prokurori i Përgjithshëm, Avichai Mandelblit tha më herët se ngritja e akuzave kundër kryeministrit në detyrë kishte qenë një vendim i vështirë, por që tregonte se askush nuk qëndronte mbi ligjin.
“Sundimi i ligjit nuk është një zgjedhje. Nuk është çështje e së majtës apo të djathtës. Nuk është çështje politike“, tha prokurori Mandelblit.
Kjo situatë vjen mes ngërçit politik që ka përfshirë Izraelin pas 2 zgjedhjeve që rezultuan pa fitues të qartë. As Netanjahu e as rivali i tij Benny Gantz nuk mundën të krijonin dot një qeveri koalicioni, kështu që Presidenti Rivlin iu ka kërkuar ligjvënësve të bien dakord për një kandidat për kryeministër brenda 21 ditëve për të shmangur zgjedhje të treta në një vit./Opinin.al
