Komiteti i Inteligjencës së Dhomës së Ulët në Kongresin amerikan ka publikuar sot transkriptimet e dëshmisë së ish-ambasadores amerikane në Ukrainë Marie Yovanovitch dhe dëshmive të ish këshilltarit të Departamentit të Shtetit Michael McKinley.
Dëshmitë e dy zyrtarëve të lartë të Departamentit të Shtetit amerikan janë shumë të rëndësishme në hetimin e Kongresit për shkarkimin e Presidentit Trump. Ato vijnë pas përpjekjes së Shtëpisë së Bardhë për të ndaluar disa zyrtarë që të dëshmojnë.
Ish-ambasadorja e SHBA, Marie Yovanovitch ka dëshmuar se Shtëpia e Bardhë, konkretisht Presidenti Trump, nëpërmjet avokatit të tij Rudy Giuliani, janë përpjekur të minojnë figurën e saj dhe ta deligjitimojnë në Ukrainë për ta shkarkuar më pas si ambasadore.
Yovanovitch tha që ajo ishte “e tronditur” dhe “e shqetësuar” kur mësoi se Presidenti Trump i tha privatisht Presidentit të Ukrainës Volodymyr Zelensky se ajo “po kalonte një periudhë të vështirë”.
Në dëshminë e saj ajo thotë se nuk kishte “politikë zyrtare” në Departamentin e Shtetit për të lidhur ndihmën e Ukrainës me hetimet e ish-zv/presidentit Biden. Por pasi lexoi materialet e publikuara nga Demokratët në fillim të hetimeve dyshoi “nëse kishte një politikë jozyrtare”. Ajo nënvizon se Rudi Giuliani drejtonte një politike paralele të SHBA në Ukrainë.
Përmendja e emrit të saj në bisedën mes dy presidentëve si dhe sulmet nga avokati i Turmp, bën që ajo të kërkonte nga Deparatamenti i Shtetit një reagim ku të konfirmohej roli i saj si përfaqësuese e politikës së SHBA në Ukrainë, por sipas dëshmisë së saj kjo gjë i ishte refuzuar pasi mund të minohej drejtpërdrejtë nga presidenti Trump.
Nga ana tjetër, Michael McKinley, ish-këshilltari i Sekretarit të Shtetit ka dëshmuar se ai ka kërkuar tri herë shefit të tij të dalë në një deklaratë në mbështetje të ambasadores por kërkesa e tij nuk ishte marrë parasysh.
Ai dëshmoi se zgjodhi të jepte dorëheqjen nga pozicioni i tij për shkak të asaj që ai e konsideronte si përdorim të ambasadorëve “për të çuar para objektivat e brendshëm politikë”. Ai shton gjithashtu se në bisedën me zëvendës ndihmës sekretarin për Europën dhe Euroazinë, George Kent, ky i fundit ka shprehur shqetësimin se nuk po i dërgohen të dhënat e plota nga departamenti i shtetit.
McKinley thotë në dëshminë e tij gjithashtu se një nga arsyet që ai dha dorëheqjen ishte nga implikimi i SHBA me qeveritë e huaja për të siguruar informacion negativ për kundërshtarët politikë në favor të Presidentit Turmp.
Këto dëshmi rëndojnë pozitat e Presidenti Trump në çështjen e tij ndaj Kongresit pasi tregojnë se ai është angazhuar në mënyrë jo zyrtare, duke anashkaluar Departamentin e Shtetit, për të marrë informacione kundër kundërshtarëve të tij politik. /Opinion.al
