Pasi korri sukses të jashtëzakonshëm krah Bradley Cooper në filmin “A Star Is Born”, Lady Gaga ka marrë një tjetër ftesë, kësaj here për të luajtur në filmin e regjisorit Ridley Scott, “Gucci”.
Ky film do të lidhet me vrasjen e ikonës së modës Maurizio Gucci, nipi i themeluesit të firmës Gucci. “People” shkruan se Gaga do të interpretojë ish-gruan e Guccit, Patrizia Reggiani, e cila është shpallur fajtore për vrasjen e tij.
Për këtë rol Gagës do ti duhet të shndërrohet në një zonjë italiane të shoqërisë së lartë, e cila bëri dy fëmijë me kreun e shtëpisë së famshme të modës, para se të divorcohej më 1985. Edhe pse i ka mohuar gjithmonë akuzat, Reggiani është dënuar për urdhërimin e një vrasësi me pagesë për të eliminuar ish-bashkëshortin jashtë zyrës së tij në Milano, në 1995, në një atentat të stilit mafioz. Gjatë gjyqit që u ndoq nga të gjitha mediat botërore ajo u etiketua si “vejusha e zezë” dhe bëri 18 vjet burg para se të lirohej në vitin 2016.
Ndërkaq kujtojmë se performanca në prodhimin kinematografik “A Star Is Born” i siguroi Lady Gagës çmimin Oscar për kolonën zanore dhe një kandidaturë si aktorja më e mirë femër./Opinion.al
