Atentati i ndodhur mbrëmjen e djeshme në mbikalimin e Shkozetit la të plagosur prokurorin Arjan Ndoja, shoferin e tij Andi Maloku dhe një personazh të njohur të botës së krimit, Pëllumb Muharremi i njohur ndryshe si “Rrumi”.
Ky i fundit është akuzuar më parë nga Partia Demokratike se ka kërcënuar anëtarët e saj gjatë fushatës elektorale. Në një postim në Facebook, ish-deputeti Ervin Salianji deklaron se ka nisur një konflikt “mes bandave që mbeshtesin Ramën”.
“Nuk ka ngjarje kriminale që mos të ketë të përfshirë individe me rekorde të rënda kriminale dhe mafioze që janë përdorur në fushatë nga Rama” shkruan Salianji teksa kujton se në 2015 PD denoncoi me emër dhe mbiemër “Rrumi” allias Land/Pellumb Muharremi dhe Bert dhe Gezim Hoxhën se kishin kërcënuar me jetë “çdo përfaqësues të PD në komisione duke lënë bosh shumicën e komisioneve në ish Bashkinë Sukth”.
Por sipas Salianjit policia i mori në mbrojtje dhe nuk i arrestoi edhe pse ndaj tyre kishte një urdhër ndalimi nga prokuroria.
“Pas zgjedhjeve Bert Hoxha u emërua administrator i Njësisë Sukth si shpërblim për vjedhjen e votave!” shkruan ish-deputeti.
“Ne nuk i harrojmë, me forcën e ligjit do ti shtypim bandat dhe mafian që po i pinë gjakun Shqipërisë dhe po e bëjnë të pabanueshme për qytetarët!” mbyll Salianji postimin e tij. /Opinion.al
