Kosova sot i është drejtuar kutive të votimit për zgjedhjet e parakohshme parlamentare. I pari nga kandidatët për kryeministër ka votuar Kadri Veseli.
Ai votoi në shkollën “Faik Konica” në Prishtinë. Në një deklaratë të shkurtër për mediat Veseli uroi që qytetarët e Kosovës t’i japin sot një perspektivë vetes dhe të ardhmes së tyre.
“Sot është një ditë e jashtëzakonshme për Kosovën. Uroj që qytetarët t’i japin perspektivë Kosovës perëndimore, vetes dhe të ardhmes së tyre”, deklaroi Veseli.
Pas tij votoi kryetari i Lëvizjes Vetëvendosje, Albin Kurti. Ai i bëri thirrje qytetarëve të Kosovës të dalin të votojnë, për të ushtruar të drejtën e tyre.
“Të gjithë kemi të drejtën e votës dhe ta shfrytëzojmë këtë shans unik për nga karakteri e historik për nga pesha. Le të votojmë dhe të festojmë. Sot është një ditë e veçantë. Në ditën e sotme nuk ka rëndësi a je i pasur, a je i varfër, a je grua a je burrë, a je i ri a je i moshuar, e je nga fshati a je nga qyteti, a ke mbaruar shkollën e lartë, apo jo, të gjithë jemi të barabartë. Ne duhet të presim rezultatet në orët e mbrëmjes dhe votimin masiv të sotëm ta shndërrojmë në një festë masive”. tha Albin Kurti pasi votoi në Prishtinë.
Ish-kryeministri Haradinaj votoi së bashku me gruan e tij, Anita Haradinaj në shkollën e Mjekësisë “Ali Sokoli” në Prishtinë
Haradinaj gjithashtu i bëri thirrje qytetarëve të Kosovës të dalin në votime pa marrë parasysh bindjeve politike dhe përkatësisë etnike.
“Vetëm me votë vendosim vetë për veten tonë, për ata që nuk votojnë vendosin të tjerët, ata që votojnë”, tha Haradinaj .
“Është sukses për Kosovën një demokraci kaq e mirë. Çdo gjë ka shkuar mjaft mirë në të gjithë vendin, në të gjitha pjesën e Kosovës. Jemi në proces të rëndësishëm për vendin. Të gjithë do të vendosim sot ashtu si është e drejtë për vendin tonë”, shtoi ai. /Opinion.al
