Në hetim lidhur me operacionin ndërkombëtar “Kuito” në kuadër të të cilit u sekuestruan 137 kg kokainë janë përfshirë edhe zyrtarë të portit të Durrësit, për të cilët mendohet se mund të kenë krijuar favorizime për hyrjen e personave të paautorizuar në ambjentet e portit.
Mësohet se grupi hetimor ka sekuestruar pamjet filmike për hyrje daljet në port për të parë cdo lëvizje që do të hedhë dritë mbi dyshimet e ngritura.
Ishin autoritetet greke ato që zbuluan në Portin e Pireut një sasi prej 137 kilogramë kokainë, që vinte nga Ekuadori me destinacion final Shqipërinë. Droga ishte fshehur në motorët e frigoriferëve në katër kontenierë me banane, të porositura nga një kompani shqiptare.
Pas zbulimit, autoritetet e vendit fqinj informuan policinë, dhe vendosën ta zëvendësonin drogën me oriz, teksa brenda pakove vendosën GPS. Kur ngarkesa mbërriti në Durrës, skuadra operacionale i mbajti nën vëzhgim kontenierët, teksa përgjatë katër ditëve fotografuan dhe filmuan lëvizjen e disa personave të dyshuar si pritësit e drogës.
Si përfundim në pranga kanë përfunduar, Ardian Bega dhe Altin Myslimhaka ndërsa në kërkim është shpallur Gentian Malindi./Opinion.al
