Në përfundim të takimit mes liderëve të dy partive më të mëdha opozitare në vend kryefjala e tyre ka qenë se aksioni opozitar do të vazhdojë me denoncime dhe me protesta.
“Protestat do të jenë gjithmonë e më të fuqishme” tha Basha në fillim të fjalës së tij për gazetarët. Ai akuzoi edhe njëherë qeverinë se po tenton te vjedhë paratë publike përmes koncesioneve të rrugëve.
“Ka disa çështje të mprehta që dua të sjell në vëmendjen tuaj, koncesionet Milot-Balldren dhe Vlorë-Orikum. Bëhet fjalë për një aferë të tmerrshme korruptive. Tek Milot-Balldreni duan të bëjnë shqiptarët të paguajnë 5 herë më shtrenjtë se çmimi real” tha ndër të tjera Basha duke shtuar se opozita është “e vendosur të denoncojë deri në fund këtë aferë.
Paralajmërimin për aksionin opozitar e dha edhe kryetarja e LSI. “Aksioni do të vazhdojë ashtu siç është, i drejtpërdrejtë dhe për të zgjuar çdo qelizë të shqiptarë, që janë margjinalizuar” tha Kryemadhi.
Të dy përfaqësuesit e opozitës shprehën kritikat, edhe me nota ironie, ndaj parlamentit.
“Kjo ndërtesa që është prapa selisë tonë, që duhet të shërbente për kufizimin e pushtetit është kthyer në një noter të hajdutërisë” tha Basha gjatë fjalës së tij. Ndërsa Kryemadhi teksa u pyet nga gazetarët për parlamentin, u shpreh se: “Për kë parlament po flisni? Për këtë parlament të dështuar?!”. /Opinion.al
