Kryetari i ri i Bashkisë së Rrogozhinës, Haxhi Memolla mori institucionin duke iu dhuruar dhe një përqafim nga ish-kryetari Beqir Nuredini. Këtë të hënë u konstituua Këshilli i ri Bashkiak, ndërkohë që më pas u betua edhe kryetari i ri.
“Pushteti kaloi paqësisht. Falenderoj të gjithë palët që ishin pjesëmarrëse. Gjithashtu edhe kryetarin e bashkisë aktual sepse kemi pasur marrëdhënie të mira gjatë këtyre 4 vjetëve që kam punuar dhe kam qenë nënkryetar bashkie bashkë me të”, tha Haxhi Memolla.
Ndërkohë nga ana tjetër, ish-kryetari Beqir Nuredini në një prononcim të shkurtër për mediat deklaroi se e konsideron të pavlefshëm procesin e 30 Qershorit. Ndër të tjera, Nuredini theksoi se nuk ka ndërmend të përplasë qytetarët e Rrogozhinës me njëri-tjetrin, kështu që ka vendosur ta lirojë paqësisht godinën ku punoi për katër vite.
“Sigurisht që e konsiderojmë të pavlefshëm të gjithë këtë proces për aq kohë sa edhe dekreti i Presidentit për ne është i vlefshëm dhe është akoma në fuqi. Një qeveri që ka kapur të gjitha pushtetet sigurisht që ka gjykuar të vlefshme të merrte dhe këtë godinë në Bashkinë e Rrogozhinës. Unë nuk kam ndërmend të përplas njerëzit me njëri-tjetrin për aq kohë sa janë bashkëqytetarë dhe jetojnë me njëri-tjetrin, kështu që kam vendosur ta liroj paqësisht këtë godinë me këtë arsyetim besoj të logjikshëm”, tha Nuredini. / Opinion.al
