Efektivë të Forcave të Armatosura janë veshur me uniformë të policisë. Të paktën kështu pretendon Partia Demokratike. Ish deputeti Flamur Noka në një deklaratë për mediat tha se “skenari i Ramës ka për qëllim që kriminelët me uniformë policie, ushtarët me uniformë policie, militantët e PS me uniformë policie të provokojnë dhunë, përplasje me qytetarët”.
“Një video e shkurtër e siguruar para pak minutash në Dibër, tregon një automjet të Ministrisë së Mbrojtjes, që, sipas informacioneve tona po transporton forca të ushtrisë, të veshur me uniformën e policisë kufitare”, tha Flamur Noka.
https://www.facebook.com/partiademokratike/videos/455046891963570/
Sipas tij veshja e personave civilë apo efektivave të Forcave të Armatosura me uniformë të policisë është një shkelje e rëndë ligjore dhe përbën vepër penale.
“Me urdhër të Sandër Lleshit dhe të Edi Ramës, po kryhen të paktën dy vepra penale, “Përvetësim i detyrës shtetërore” dhe “Mbajtja pa të drejtë e uniformës”. Këto vepra ndëshkohen me burg nga Kodi Penal i Republikës së Shqipërisë, përkatësisht nenet 246 dhe neni 247. Por megjithë angazhimin e të gjithë strukturave kriminale të Rilindjes, ky skenar dhune shtetërore i Edi Ramës do të dështojë. Qytetarët nuk pranojnë kurrë dhunën shtetërore të Edi Ramës, që për karrigen e tij, është gati të shkatërrojë gjithçka. Shqiptarët janë gati të reagojnë si qytetarë europianë kundër instalimit të një diktature të re në Shqipëri”/ Opinion.al
