Komisioni i Ligjeve miratoi me 13 vota pro, 1 kundër dhe asnjë abstenim raportin me propozimin për Kuvendin e Shqipërisë për ngritjen e një komisioni për të hetuar shkeljen e Kushtetutës nga ana e Presidentit Ilir Meta pas anulimit të 30 Qershorit.
Relatori që hartoi raportin, Adnor Shameti renditi të gjitha ato që i cilësoi si shkelje të rënda kushtetuese nga ana e kreut të shtetit. Sipas tij, Presidenti nuk kishte interes për t’u dëgjuar në këtë komision.
Raporti do t’i paraqitet Kuvendit në seancën e datës 4 Korrik dhe për t’u miratuar kërkon shumicë të thjeshtë votash. Por çfarë përmban ky raport dhe cilat janë shkeljet që ka bërë presidenti, sipas mazhorancës qeverise?
Pas hetimit nga ky komision, raporti final kërkon 93 vota për t’u miratuar. Më pas është Gjykata Kushtetuese që ka fjalën e fundit që vendos nëse Presidenti ka shkelur apo jo Kushtetutën, duke vendosur në këtë mënyrë dhe nëse ai do të vazhdojë mandatin deri në 2022 apo do t’i ndërpritet./ Opinion.al
