Kreu i Opozitës, Lulzim Basha në një konferencë për mediat ka folur në lidhje me vendimin e ministrave të Jashtëm të vendeve anëtare të Bashkimit Europian që shtynë për në muajin Tetor marrjen e një vendimi për hapjen e bisedimeve për anëtarësim me Shqipërinë dhe Maqedoninë e Veriut.
“Korrupsioni dhe krimi i Edi Ramës është arsyeja e vetme pse na janë mbyllur dyert e Europës. Edhe pse i pritshëm,është një lajm i hidhur për ne shqiptarët, që, edhe 30 vjet pas rënies së komunizmit, vazhdojmë të mbetemi vendi më i izoluar nga Europa. Edhe më i rëndë është fakti se, më shumë se një refuzim i përkohshëm i negociatave, sot, ne shqiptarëve, po na vihet në dyshim aftësia për të përqafuar dhe jetuar sipas standarteve dhe vlerave europiane. Propaganda e Edi Ramës dhe mercenarëve të tij, do të përpiqet ta mohojë refuzimin”, tha Basha.
Sipas tij Edi Rama do të fajësojë Europën se ka probleme të vetat, pas këtij vendimi. Po ashtu Basha tha se kryeministri do të akuzojë dhe opozitën.
“Do të fajësojë gjysmën e botës. Do të fajësojë edhe popullin e vet. Nuk do të fajësojë vetëm një njeri: Edi Ramën. Mos u gënjeni nga propaganda e tij. Ka vetëm një përgjegjës për refuzimin e vazhdueshëm ndaj Shqipërisë: Është qeveria dhe Edi Rama. Ka vetëm një arsye pse na janë mbyllur dyert e Europës: korrupsioni dhe krimi”./ Opinion.al
