Dy shqiptarë janë ekstraduar nga Anglia dhe Belgjika, pasi akuzohen për vepra penale në fushën e krimit ekonomik dhe falsifikim dokumentesh.
Kreshnik Kule, 35 vjeç, u ekstradua nga Belgjika drejt Shqipërisë, pasi Gjykata e Rrethit Gjyqësor Tiranë, në vitin 2016 e ka dënuar këtë shtetas me 10 vjet burg, për veprën penale “Mashtrimi”.
Kule u arrestua nga autoritetet policore në Belgjikë me qëllim ekstradimin drejt Shqipërisë, pas informacioneve të dërguara nga Zyra Qendrore Kombëtare Interpol Tirana.
35-vjeçari në bashkëpunim me të atin, në vitin 2008 kanë mashtruar një shqiptar dhe i kanë marrë shuma të konsiderueshme parash (rreth 30.000 $) duke i premtuar që do të mundësonin dërgimin e tij dhe të familjes së tij në Kanada.
Gjithashtu, Specialistët e Interpol Tirana, ekstraduan nga Londra shtetasin shqiptar, S.P. 40 vjeç, lindur në Fier.
40 vjeçari ishte shpallur në kërkim ndërkombëtar pasi Gjykata e Rrethit Gjyqësor Fier në Mars të vitit 2018, ka caktuar masën e sigurisë ”Arrest me burg” për veprat penale “Falsifikim monedhash”, “Falsifikim i dokumenteve” dhe “Falsifikim i letërnjoftimeve, ose vizave”./ Opinion.al E.Xh.
