Krerët e ‘Frontit të Bashkuar Opozitar’ kanë mbajtur sot një takim në Shkodër në lidhje me protestën e 2 qershorit. Aleatët e Partisë Demokratike kanë dalë në disa qëndrime të unifikuara në lidhje me zgjedhjet e 30 qershorit, daljen nga kriza dhe në fund me një apel për protestën.
“Më 30 qershor zgjedhje nuk duhet, nuk mund dhe nuk do të ketë” tha Vangjel Dule. Kjo ishte një nga pikat që krerët e partive aleate e theksuan fort në Shkodër. Sipas tyre këto zgjedhje janë një kërcënim për pluralizmin në vend pasi ato po zhvillohen pa opozitë dhe në një kohë kur vendi nuk ka një parlament legjitim. Në lidhej me këtë të fundit, Agron Duka bëri thirrje që të bojkotohet edhe nga deputetët që Rama i ka quajtur “zëvendësues të Partisë Demokratike”.
Dalja nga kriza ndodh vetëm nëpërmjet një qeverie tranzitore e cila do të marrë një kohë të mjaftueshme për të organizuar zgjedhje të përgjithshme dhe lokale. Një tjetër pikë e rëndësishme që u tha nga ish deputetët opozitarë ishte se zgjedhjet e ardhshme të përgjithshme duhet të zhvillohen nën një sistem proporcional, kombëtar apo rajonal, me lista të hapura.
Në fund takimi u mbyll me një apel për pjesëmarrje sa më masive në protestën e 2 qershorit për ti dhënë një mesazh sa më të qartë qeverisë por edhe ndërkombëtarëve.
“Ai zotëria po tenton me një parti, ne do t’i themi ‘nuk do të lejojmë’, kjo është e drejta jonë. Kemi mundësi të kemi pluralizëm, po qemë të zotët ia arrijmë, po na thyen, bravo ju qoftë, do t’i durojmë pastaj, do të ulim kokën e të rrimë. Unë ju falenderoj se jam i sigurt që Shkodra s’ka ndërmend ta ulë kokën” tha Dashamir Shehi përpara mbështetësve të Shkodrës. /Opinion.al
