Procesit gjyqësor për Emiliano Shullazin dhe 4 të pandehurve të tjerë të grupit të tij, do t’u delegohet edhe gjyqtari i tretë pasi Këshilli i Lartë Gjyqësor të mblidhet në 20 Maj.
Burime nga Gjykata e Apelit e Krimeve të Rënda, aty ku po gjykohet çështja, bëjnë me dije se këshilli do të delegojë një gjyqtar nga gjykatat e Apelit pasi të gjitha alternativat e saj janë ezauruar.
Deri tani trupa gjykuese e këtij procesi përbëhet nga dy gjyqtare, Saida Dollani dhe Albana Boksi.
Procesi ndaj ‘grupit të Shullazit’ ka ngecur si pasojë e mos pasjes së një trupe me tre gjyqtarë për të gjykuar çështjen, pasi deri më tani nga procesi janë tërhequr tre gjyqtarë të krimeve të rënda.
Ata janë Fehmi Petku që u shkarkua nga Komisioni i Pavarur i Kualifikimit, Nure Dreni që u dorëhoq për shkak se kishte shqyrtuar një çështje tjetër në lidhje me Shullazin dhe së fundmi Sokol Binaj i cili ende nuk ka dhënë shpjegime mbi arsyen.
Kujtojmë se në gjykatën e Shkallës së Parë grupi ‘Shullazi’ është dënuar me 55 vite burg./Opinion.al
