Krijimi i një qeverie tranzitore, që do të garantojë zgjedhje të lira dhe të ndershme, është një nga kushtet bazë që koalicioni opozitar kërkon pas largimit të Edi Ramës si kryeministër. Por opozita asnjëherë nuk ka bërë të ditur emrat të cilët mund të përbëjnë këtë qeveri tranzitore.
Kryetari i Partisë Republikane, Fatmir Mediu ka folur sot për herë të parë në lidhje me këtë çështje në një intervistë për “A2 News”. Ai përmendi disa nga emrat që mendon se do të ishin të përshtatshëm për shkak të profilit të tyre.
“Po ju them disa emra, Arben Malaj, Arta Dade, Ylli Bufi, Rexhep Mejdani, Besnik Mustafaj, Rexhep Uka, Myqerem Tafaj” tha Mediu.
Kjo është hera e parë që një nga anëtarët e opozitës së bashkuar flet me emra konkret për qeverinë, që sipas tyre duhet të pasojë dorëheqjen e kryeministrit të cilën ata kanë me se 3 muaj që e kërkojnë. Megjithatë ky mund të jetë qëndrimi personal i zotit Mediu dhe jo ai i opozitës së bashkuar.
Ndër të tjera Mediu theksoi faktin se një zgjidhje për situatën e krijuar në vend është e domosdoshme në mënyrë që të shmanget përsëritja e problemeve dhe konflikteve.
“Unë mendoj që duhet të bëjmë zgjedhje të parakohshme lokale dhe parlamentare, ndoshta pas gjashtë muajsh. Dhe këtë periudhë gjashtëmujore duhet të kemi një qeverisje që përbëhet nga figura që kanë pasur autoritetin për të kontestuar të keqen brenda forcës së tyre politike, por edhe që kanë qenë me një eksperiencë politike të vlefshme që mund të garantonin një marrëdhënie të qëndrueshme të të dy krahëve për zgjedhje të lira dhe të ndershme”, tha Mediu./ Opinion.al
