Prokurorja e Përgjithshme e përkohshme, Arta Marku ka folur për dosjen 339, apo siç njihet zyrtarisht “339-1, në të cilën janë përfshirë persona me rekorde kriminale, grupi i Avdylajve, ku dyshohet se komunikojnë me kryebashkiakun e Durrësit, Vangjush Dako.
Sipas saj, këto dosje janë mbajtur vetëm në fazën e hetimit, me përgjime dhe asnjë nuk është zbardhur në letër.
“Prokuroria nuk është më një organ i centralizuar, piramidal, në kuptimin që varet nga Prokurori i Përgjithshëm, por një sistem tërësisht i decentralizuar pas ndryshimeve të fundit kushtetuese të vitit 2016 dhe ligjeve që pasuan. Zot i çdo çështjeje penale janë vet prokurorët në krye tyre, duke u përgjigjur për hetimin, për zgjidhjen dhe japin llogari vetëm përpara gjykatës për vendimmarrjen e tyre. Prokurori i Përgjithshëm nuk ka asnjë të drejtë të kërkojë informacion të detajuar për asnjë nga çështjet, nuk mund të marrë përsipër vet hetime, madje në Prokurorinë e Përgjithshme nuk bëhen më hetime. Kjo Prokurori ka vetëm të drejtën për të përfaqësuar çështje në Gjykatën e Lartë dhe atë Kushtetuese.”
Marku tha se duhet kohë për zbardhjen e përgjimeve, ndërsa deklaroi se sipas mendimit të saj personal nuk është lënë krejt rastësisht, por janë mbajtur qëllimisht kaq gjatë.
Të qëllimshme nga kush?
“Sigurisht nga prokurori që e ka pasur. I ndikuar po, pastaj politikisht apo në ndonjë mënyrë tjetër nuk preferoj ta them. Por di që është mbajtur për një kohë shumë të gjatë dhe disqet ende të patranskriptuara, që në fakt të vrasin sytë se janë 700 jo pak për t’u harruar”./ Opinion.al E.Xh.
