Qeveria ka vendosur që të ashpërsojë Kodin Penal, duke dënuar me burg (10-15 vjet burg) tregtarët të cilët abuzojnë me sigurinë e ushqimeve.
Në një tryezë me tregtarë të mëdhenj të kësaj fushe, shefi i qeverisë tha se perceptimi se në Shqipëri “shitet” helm është i gabuar. E për këtë Edi Rama bëri fajtorë mediat.
“Perceptim se hahet helm është i gabuar, ushqehet dhe nga media. Prandaj ndëshkohen fermerët shqiptarë, sipërmarrësit që i janë kushtuar eksportit. Vitin me parë kanë eksportuar 300 mijë tonë ushqime”, tha Rama.
Një nga aspektet më problematike, sipas tij është aspekti legjislativ, në lidhje me ndëshkimin. Ndëshkimet janë shumë-shumë pak, për të mos thënë zero për kategorinë e abuzuesve.
“Ata që cenojnë shëndetin, duhet të përballen me një konsenguencë shumë të fortë. Si mundet që vdekja e prodhuar të jetë argumenti për të ndëshkuar dikë. Do të thotë që duhet të vdesë dikush, që ai që e tregton këtë produkt, është e papranueshme dhe i përket një kohe të largët 20 e më shumë vjet të legjislacionit tonë penal dhe krijon kaq shumë mundësi për abuzim dhe korrupsion dhe një shteg të mbyllur për goditjen e abuzuesve”, theksoi Rama.
Po ashtu ai nuk la pa përmendur dhe shitësit e rrugës. “Gjithçka bëhet për të larguar shitjen e ushqimit nga rruga, bëhet për të mos lejuar cenimin e shëndetit. Në rrugë shitet një produkt kërcënues për jetën, për shëndetin. Nuk mund ta lëmë se e bën këtë aktivitet për bukën e gojës, se marrim pjesë në dëmtimin e shëndetin”, tha kryeministri./ Opinion.al
