Pas Samitit të Berlinit, kryeministri Edi Rama ka reaguar nëpërmjet një statusi në Twitter. Ai u përgjigjet të gjithë atyre që Samitin e Berlinin e quajtën një dështim për Shqipërinë, duke thënë se është i “mahnitur nga kazanët dhe ligësitë”.
“I mahnitur nga kazanët e nga ligësitë e të dëshpêruarve që duan me patjetër dështimin e Shqipërisë dhe dështimin me çdo kusht të procesit të dialogut Kosovë/Serbi gjithashtu! Por Shqipëria s’do të dështojë kurrësesi dhe dialogu do vazhdojë pa kushte e as paragjykime nga askush”, shkruan Rama.
Dje u zhvillua Samiti i Berlinit me vendet e Ballkanit Perëndimor, ku Rama zhvilloi ndër të tjera edhe një takim kokë më kokë me Kancelaren Angela Merkel.
Të paktën jo zyrtarisht, por sipas burimeve të Deutsche Welle, Angela Merkel i ka thënë kryeministrit Edi Rama se afati kohor që nga publikimi i raportit të progresit të BE-së, më 29 maj deri në samitin e BE-së në qershor nuk mjafton për të marrë një vendim për çeljen e negociatave, ndaj gjithçka shtyhet për në qershor.
Një tjetër “fshikullim” erdhi për Shqipërinë në lidhje me vizat. Presidenti Macron e ka argumentuar mosmiratimin e heqjes së regjimit të vizave për shtetasit e Kosovës me përvojën e keqe të Francës pas liberalizimit të vizave me Shqipërinë dhe Gjeorgjinë, ku u shtua si numri i emigrantëve të parregullt ashtu edhe i kriminalitetit nga këto vende./Opinion.al
