E gjithë vëmendja të hënën ishte në Berlin. Kancelarja gjermane Angela Merkel dhe presidenti francez Emanuel Macron pritën në një samit liderët e Ballkanit perëndimor. Por si përfundoi ky samit?
Për Shqipërinë- Të paktën jo zyrtarisht, por sipas burimeve të DW, Angela Merkel i ka thënë kryeministrit Edi Rama se afati kohor që nga publikimi i raportit të progresit të BE-së, më 29 maj deri në samitin e BE-së në qershor nuk mjafton për të marrë një vendim për çeljen e negociatave. Kështu që çelja e negociatave shtyhet për në shtator. Po ashtu një tjetër fshikullim erdhi për Shqipërinë në lidhje me vizat. Presidenti Macron e ka argumentuar mosmiratimin e heqjes së regjimit të vizave për shtetasit e Kosovës me përvojën e keqe të Francës pas liberalizimit të vizave me Shqipërinë dhe Gjeorgjinë, ku u shtua si numri i emigrantëve të parregullt ashtu edhe i kriminalitetit nga këto vende. Nisur nga fushata elektorale aktuale për zgjedhjet e parlamentit evropian, Macron kishte argumentuar se nëse ai do të hiqte vizat edhe për Kosovën, kjo do të ishte në favor të partisë djathtiste të Frontit Nacional.
Për Kosovën- Duket se debatet më të forta kanë qenë mbi diskutimet e fundit mes Kosovës dhe Serbisë për ndryshim kufijsh. Gjermania dhe Franca janë kundër kësaj ideje, e cila ka dhe një “shkelje syri” nga SHBA. Më i pakënquri i samitit doli Hashim Thaçi. Deklaratat e tij tregonin hapur zhgënjimin, ndërsa dy liderët më të fuqishëm të BE-së u rreshtuan në krah të kryeministrit të Kosovës, Ramush Haradinaj. “Grindja mes Prishtinës dhe Beogradit ishte ndoshta arsyeja më urgjente për thirrjen e samitit, por edhe detyra më e vështirë e tij: Duhej të fshihej përfundimisht nga tryeza e bisedimeve ideja e korrigjimit të kufijve në kompensimin mes Kosovës dhe Serbisë, një “deal” që presidentët e të dyja vendeve me mbështetjen amerikane prej muajsh e kishin sjellë në skenë”, mendon Adelheid Feilcke, drejtoreshë e Departamentit të Europës në Deutsche Welle.
Për Serbinë- Samiti nuk solli asgjë të re. Presidenti i Serbisë, Alexandar Vucic do të deklaronte pas samitit: “Fjala e fundit e këtij samiti ishte që të vazhdojnë bisedimet në një format të ngushtë me ndërmjetësimin e Bashkimit Evropian, Gjermanisë dhe Francës, në mënyrë që të gjendet një zgjidhje për të vazhduar dialogun”. Në dokumentin e publikuar pas samitit, kërkohet vazhdimi i dialogut për normalizim por nuk përmenden as tarifat doganore ndaj Serbisë, e as propozimi për ndryshim kufijsh.
Për Maqedoninë- Fituesi më i madh ishte kryeministri Zoran Zaev. Marëveshja e Prespës ishte modeli që përmendën Merkel dhe Macron për zgjidhjen e problemeve. Megjithatë dhe ky i fundit pati kërcënimet e tij. Zaev, sipas burimeve nga samiti, ka kërcënuar se do të jepte dorëheqjen nëse BE nuk jepte dritën jeshile për çeljen e negociatave. Dhe në fakt përpara këtij Samiti “fjalët më të mira” janë thënë për Maqedoninë.
Ndjesa publike e DW- Korrigjim i një gabimi teknik!
Të nderuar miq të Deutsche Welles! Me reagimet tuaja dje Ju kishit të drejtë ! Sepse një njoftim i zyrës së shtypit të kryeministrit, Edi Rama është publikuar dje gabimisht në faqen tonë të Facebookut. Që gabimi është thjesht teknik dhe pas tij nuk fshihen qëndrime të njëanshme politike, këtë e tregon postimi një për një, njoftimi u keqkuptua si njoftim i korrespondentit tonë. Ne asnjëherë nuk do të përdornim publikimet e zyrave të shtypit të politikës si informacione tonat. Ju kërkojmë ndjesë për këtë keqkuptim!
Ky reagim erdhi pasi në një postim në faqen zyrtare të Facebook, DW do të ndryshonte qëndrim./ Opinion.al
