Pas grabitjes të ndodhur ditën e djeshme në aeroportin e Riansit, forcat e ushtrisë shqiptare janë vendosur në perimetrin e aeroportit “Nënë Tereza” . Lajmi është konfirmuar nga ministrja e Mbrojtjes Olta Xhaçka, e cila tha se për të rritur sigurinë në aeroportin e Rinasit, do të jenë të pranishme dhe policia ushtarake.
Xhaçka tha se siguria e aeroportit të Riansit ka dështuar tërësisht dhe se ngjarje të tilla nuk mund të ndodhin në një vend kaq të rëndësishëm. Ministrja tha se në lidhje me grabitjen e djeshme personat përgjegjës të marrin dënimin e merituar, ndërsa theksoi se kjo situat kërkon ndërhyrje urgjente, pasi po cenohet siguria e qytetarëve dhe imazhi i vendit.
“Ngjarja që ndodhi dje në aeroportin e Rinasit ishte një ngjarje shumë e rëndë. I bashkohem shqetësimit të qytetarëve dhe kolegëve që një ngjarje e tillë nuk mund të ndodhë në një zonë të rëndësisë së veçantë. Ajo që tashmë dihet nga hetimet është se mekanizmat e sigurisë që janë në përgjegjësinë e kompanisë kineze koncesionare të aeroportit kanë dështuar tërësisht. Koncesionari ka dështuar të përmbushë përgjegjësinë e tij për garantimin e parametrave të sigurisë fizike dhe nuk ka zbatuar standardet e detyruara të sigurisë që përcaktohen nga legjislacioni vendas dhe nga Organizata Botërore e Aviacionit Civil.
Kjo është një shkelje e papërgjegjshme, por edhe e rëndë e legjislacionit shqiptar, për të cilën shpresoj dhe besoj që përgjegjësitë penale do jenë konkrete. Kjo situatë kërkon ndërhyrje urgjente sepse nuk mund të lejojmë që të cenohet as siguria e qytetarëve dhe as imazhi i vendit. Për këto arsye në kushte e një papërgjegjshmërie të përsëritur të koncesionarit për të respektuar detyrimet e tij ligjore për të garantuar sigurinë e aeroportit kam urdhëruar që në perimetrin e sigurisë së aeroportit “Nënë Tereza”, të vendosen efektivë të Policisë Ushtarake dhe të batalionit special të Forcave të Armatosura. Kjo është një praktikë që zbatohet sot, thuajse në çdo qytet evropian, ku njësi forcash të armatosura vendosen në mbështetje të kolegëve të tyre me qëllimin e garantimit të objekteve të sigurisë së lartë dhe sigurisë së qytetarëve.
Po ashtu, duke qenë që në një distancë fare të shkurtër nga aeroporti i Rinasit ndodhet edhe Komanda Ajrore e Forcave të Armatosura, kam udhëruar që edhe Policia Ushtarake të dislokohet në këtë komandë, duke ju bashkuar kështu Policisë së Shtetit për ta mbështetur atë në garantimin e sigurisë së aeroportit. Dua t’i garantoj të gjithë qytetarët që siguria e tyre është prioriteti ynë kryesor dhe askush nuk duhet të vërë në dyshim vendosmërinë tonë për të bërë gjithçka që duhet për ta garantuar atë”, tha Xhaçka.
Ditën e djeshme një shumë e konsdiderueshme parash u grabit në aeroportin e Riansit. Ku një grup grabitësish të armatosur dhe të maskuar arritën të mërrnin nga barku i aeroplanit thasët me para. Gjatë tentativës për t’u larguar, grabitësit kanë shkëmbyer zjarr me forcat e policisë, ku mbeti i vrarë Admir Murataj. Ai akuzohet për një seri grabitjesh në Shqipëri, ndërsa në vitin 2013 rezulton se është arratisur nga një burg grek./ Opinion.al E.Xh.
