Dy avionët Boeing 737 Max 8 të rrëzuar në pesë muajt e fundit (i pari në Indonezi, i dyti në Etiopi), nuk kishin të instaluar dy sisteme sigurie për të cilat kompania prodhuese kërkonte një pagesë shtesë. Sipas artikullit të “New York Times”, këto sisteme sigurie do të shërbenin për të shmangur dy aksidentet, ku humbën jetën më shumë se 300 njerëz.
Megjithëse ende nuk është zbuluar zyrtarisht shkaku që ka sjellë rrëzimin e avionëve, mendohet se një pjesë e përgjegjësisë mund të jetë i një sistemi sigurie që është instaluar në Boeing 737 Max 8. Sistemi ka për detyrë të korrigjojë lëvizjen e avionit, duke bërë që nëse pjesa e përparme ngrihet më shumë se një nivel i caktuar, automatikisht e ul atë. Sipas hipotezës që kanë ngritur ekspertët, dy fatkeqësitë mund të kenë ardhur pas gabimit të sensorëve, të cilët kanë aktivizuar mekanizmin duke ulur kokën e avionit e për pasojë duke sjellë rrëzimin në tokë.
Sipas gazetës amerikane, sistemi i parë i sigurisë që mund të instalohej, ishte një dritë pulsuese e cila ndizet kur sensorët japin informacione kundërshtuese me njëri-tjetrin, ndërsa sistemi i dytë i sigurisë që nuk ishte instaluar ishte paraqitja e vlerave reale që jepnin sensorët, nga të cilat pilotët mund të kuptojnë nëse janë të sakta apo të gabuara. Sipas burimeve të “New York Times”, sistemi i parë i sigurisë tashmë do të instalohet në të gjithë flotën e avionëve Boeing, e cila qëndron e bllokuar prej rreth dy javësh./Opinion.al
