Shkëlzen Berisha, djali i ish-kryeministrit Sali Berisha, ka deklaruar në emisionin ‘Të Paekspozuarit’ se në gjyqin e zhvilluar në SHBA kundër Guy Lawson, ka dalë edhe emri i Erion Veliajt.
Guy Lawson është autori i librit “Armët dhe çunat”, që i referohet historisë së Efraim Diverolit dhe trafikut të armëve nga Gërdeci. Berisha hodhi në gjyq Lawson pasi në libër përmendej si person i përfshirë në aferën e Gërdecit.
Gjatë intervistës në studio, Shkëlzen Berisha theksoi se autori i librit “ka identifikuar Erion Veliajn si një nga burimet kryesore” për ngjarjet që ka përshkruar.
Në padinë e ngritur ndaj Lawson në Amerikë, Berisha ka kërkuar 60 milionë euro dëmshpërblim, por kërkesa nuk është pranuar në gjykatë.
Pjesë nga intervista
Ylli Rakipi: Ju keni vite që e investigoni këtë cështje, sepse është një problem shumë i madh për ju. Cili mendoni se është burimi i autorit në Tiranë? Që të thuash se Berishës janë “familja”, pra se janë mafia, dikush e ka bërë.
Shkëlzen Berisha: Unë i jam referuar atyre informacioneve që avokatët e mi, kanë marrë përgjatë procesit gjyqësor. Përgjatë procesit gjyqësor na janë vënë në dispozicion materiale që tregojnë se një nga burimet kryesore që zoti Lawson citon në Tiranë, është zoti Erion Veliaj.
Ylli Rakipi: Erion Veliaj? Si hyn Erion Veliaj këtu?
Shkëlzen Berisha: Erion Veliajn këtu e ka future zoti Lawson, ose zotin Lawson aty e ka future zoti Veliaj. Kjo ka dalë nga deklarimet që ai ka bërë përgjatë procesit gjyqësor në gjyqin e vitit 2018. Ny gjyq autori ka identifikuar Erion Veliajn, si një nga burimet kryesore./Opinion.al
