Videoja ku ministrja e Shtetit për Marrëdhëniet me Parlamentin, Elisa Spiropali thotë se “Don Kishoti është një figurë romantike dhe shumë komplekse e letërsisë shqiptare” është shpërndarë më shpejtësi në rrjetet sociale. E ftuar në studio në Abc Neës, zonja Spiropali u pyet për ngacmimet në rrjetet sociale.
Milori: Zonja Spiropali, kohët e fundit ka një reagim ndaj qëndrimeve tuaja të forta. Në rrjetet sociale, me mënyrën si ju flisni, si ndiheni ju? Nuk bëni dot një analizë dhe të thoni janë palë e kundërt, duan të më ngacmojnë, duan të më tensionojnë, ndoshta kanë një farë të drejtë? Si e bëni analizën tuaj? Se ka një sulm ndaj jush në rrjetet sociale.
Elisa Spiropali: Kjo është çështje të drejtë. E para unë nuk merrem fare me këto. Jam përtej vëmendjes time sepse ajo që ndodh tani dhe ne informacionin e kemi të plotë, ajo që ndodhi me intervistën “Porta a Porta” dhe me komentet që bënë, opozita ka gjetur qasjen më të gabuar.
Mirela Milori: E kam për ju, jo për Ramën.
Elisa Spiropali: Ka gjetur qasjen më të gabuar. Opozita mendon se me njerëz të paguar, me call center, pronë të deputetëve dhe me njerëz nëpër rrjete sociale që bëjnë komente denigruese dhe fyese do mund të cënojë qeverinë apo elementë të saj apo njerëz dhe do mund të rrënojë imazhin e Shqipërisë. Është një qasje prej Don Kishoti, por në fakt ky nuk është një term i duhur sepse Don Kishoti është një figurë romantike dhe shumë komplekse e letërsisë shqiptare.
***
Por në fakt zonja Spiropali nuk ka bërë vetëm këtë gafë. Gjatë një fjalimi në Kuvend në dhjetor të vitit që shkoi, teksa shprehej se për të siguruar një zhvillim ekonomik është e nevojshme bashkimi i shqiptarëve, Spiropali u ndal të fliste dhe për flamurin tonë kombëtar.
Pikërisht në këtë moment deputetja bëri një gafë duke ngatërruar ngjyrat e simbolit kombëtar, duke u shprehur se shqiponja dykrenare ndodhej në një fushë të zezë. Kur në fakt flamuri ynë ka fushë të kuqe dhe në mes të tij ndodhet shqiponja dykrenare me ngjyrë të zezë.
“Në themel të krenarisë së kësaj date qëndron simboli i flamurit, shqiponja me dy krena në fushë të zezë. Ky simbol na përbashkon kudo dhe gjithmonë, në kohë dhe në të gjitha hapsirat tona,”- u shpreh Spiropali.
Dhe ajo që nuk harrohet është krahasimi i Ramës me Skënderbeun: “Është Shqipëria që deshi Ismail Qemali, që mendoi Fan Noli, Shqipëria që vuajti Fishta dhe të tjerë Rilindas Shqiptarë. Është Shqipëria që ideoi ky burri këtu Skendërbeu. Shqipëria europiane dhe vetëm europiane dhe kam vetëm një njeri dhe vetëm një forcë politike që mund të bëjë realitet këtë ëndërr, është Edi Rama edhe është Partia Socialiste.” /Opinion.al
