Lulzim Basha ka njoftuar mbylljen e protestës së opozitës për ditën e sotme nga selia e Partisë Demokratike.
Duke folur përpara simpatizantëve, Basha njoftoi se protesta e 16 marsit është vendimtare për largimin e Ramës, duke thënë se pjesëmarrja do të jetë dyfish më shumë se ajo e 16 shkurtit.
“Sot në të katërtën protestë radhazi, populli i bashkuar ka zhvilluar etapën finale të asgjësimit të Asamblesë së Krimit dhe nxjerrjen lakuriq para syve të botës. Dita e sotme ka një rëndësi që shkon përtej tregimit të fytyrës së shëmtuar të pushtetit që vjedh shqiptarët, ka meritën e ndezjes së shpresës së çdo shqiptari për të nesërmen që vjen. Prej më shumë se gjashtë orësh në këtë protestë dhe nuk ju shkohet në shtëpi ajo jo? Por sot kemi çuar një herë e mirë në shtëpi Parlamentin, kemi hapur shtegun e vetëm nga do të kalojë e ardhmja e çdo shqiptari. Zgjidhja e vetme politike është largimi një orë e më parë, i shkaktarit kryesor, kryezullumqarit Edi Rama. Ikja e tij është fundi i pjesës së parë të kësaj beteje, e cila do të vazhdojë me bashkimin më të madh të shpresës dhe besimit në këto tre dekada. Përpiqet ta zgjasë agoninë e tij, por aq më shumë do t’i shtohet makthi dhe fatura që do paguajë para drejtësisë. Thirrje gjithë qytetarëve të lirë shqiptarë, të marrin pjesë në një tjetër akt vendimtar të hapjes së portave të shpresës, të zgjedhjeve të parakohshme të ndershme, pa Edi Ramën dhe horrat e tij, në një akt që do të na bashkojë dyfish, trefish më shumë. Më 16 mars në protestën vendimtare për ta përcjellë kufomën politike të sektit kriminal të Rilindjes për të çliruar vendit dhe për të shpëtuar të ardhme tonë, zgjedhjet, ekonominë edhe PS”, ka thënë Basha./Opinion.al
