Shtetet e Bashkuara të Amerikës i janë vënë pas njërit prej djemve të ish-udhëheqësit të vrarë të Al Qaedës, Osama bin Laden, madje kanë ofruar një shpërblim të majmë prej një milion dollarësh, për çdo informacion mbi vendndodhjen e tij.
Sipas “CNN” Hamza bin Laden është bërë shumë shpejt udhëheqës i grupit të militantëve islamikë, e me të gjitha gjasat fshihet diku pranë kufirit mes Afganistanit dhe Pakistanit.
Hamza bin Laden, i cili besohet të jetë rreth 30 vjeç, është futur në listën e “terroristëve globalë” nga Shtetet e Bashkuara që prej dy vitesh. Departamenti amerikan i Shtetit thotë se ai është martuar me vajzën e Mohammed Atta, person i cili rrëmbeu dhe devijoi një prej avionëve të pasagjerëve që u përdorën në sulmet e 2001-shit, duke e përplasur atë me një prej kullave binjake të Qendrës Tregtare Botërore në Nju Jork.
Gjatë viteve të fundit, ai ka publikuar mesazhe zanore dhe me figurë duke iu bërë thirrje ndjekësve të ndërmarrin sulme ndaj Shteteve të Bashkuara dhe aleatëve perëndimorë të tyre, në shenjë hakmarrjeje për vrasjen e babait të tij.
Hamza bin Laden besohet të ketë qenë djali i preferuar i Osamës, si dhe i përzgjedhuri për ta zëvendësuar atë si udhëheqës i Al Qaedës, referuar disa letrave të cilat iu gjetën në bunkerin ku ai u vra në vitin 2011 nga forcat speciale amerikane.
Osama bin Laden ishte personi që kishte urdhëruar dhe organizuar sulmet në Shtetet e Bashkuara më 11 shtator të vitit 2001, ku mbetën të vdekur afro 3000 njerëz./E.M, Opinion.al
