Trajneri i Partizanit Skënder Gega ka folur në prag të derbit të kryeqytetit, Tirana-Partizani që do të luhet ditën e nesërme, në orën 18:00. Gega ka thënë se kërkon ta fitojë derbin, ashtu si çdo ndeshje tjetër.
“Dua ta fitoj derbin, pastaj ka edhe 13 javë, duam edhe kampionatin. Dalim në fushë për fitore, pa bërë plane afatgjata. Historikisht Tirana e Partizani kanë qenë në pozicione të ndryshme, por në fushë kanë qenë ndeshje të mëdha, me shumë ekuilibër. Unë nuk para bëj llogari. Duam vetëm të marrim maksimumin në derbi, pastaj ka kohë për të tjerat. Shpresojmë të ruajmë ecurinë e këtij sezoni, rëndësi ka që rezultati final të jetë në favorin tonë, nuk ka rëndësi kush shënon i pari”, ka thënë ai.
Në lidhje me dënimin e Partizanit me dy ndeshje pa tifozë, për shkak të dhunës së tifozëve ndaj fotografit të ekipit të Flamurtarit, Gega është shprehur se klubi e ka mbajtur qëndrimin e tij dhe kërkon fair-play, duke uruar që të mos përsëriten më këto skena.
“Më vjen keq, sepse 3-4 persona nuk mund të dëmtojnë punën tonë dhe pjesën më të madhe të tifozerisë, që u soll në mënyrë perfekte. Klubi ka mbajtur qëndrimin e vet, unë dua fair-play dhe miqësi, shpresoj që të mos përsëriten më skena si ato në ndeshjen ndaj Flamurtarit. E duam çdo ndeshje me tifozë dhe stadiumin plot. Në derbi do i kemi tifozët, më pas do të mundohemi të përballojmë ndeshjet pa tifozë”, u shpreh Gega./Opinion.al
