Politologu Afrim Krasniqi ka thënë se mazhoranca nuk ka çfarë të ofrojë për opozitën në këtë moment. Kjo është arsyeja, sipas tij, që kryeministri Rama u ka ndaluar deputetëve socialistë për të debatuar me kundërshtarët opozitarë në publik. Krasniqi thotë se qeveria aktualisht po përpiqet të komunikojë vetëm me ndërkombëtarët dhe jo me publikun shqiptar.
“Po fitohet kohë, mazhoranca aktualisht nuk ka çfarë ofron për opozitën. Pastaj i ka ca në Parlament që janë në listën e amerikanëve “non grata”, nuk është se ka një listë cilësore. Rama po komunikon me ndërkombëtarët, gjithë kohës po komunikon me ndërkombëtarët jo me publikun në Shqipëri. Por ne e dimë përgjigjen e ndërkombëtarëve, e dimë se ku do shkojë, çështja është sa janë të gatshme palët për të negociuar, do të shkojmë në një marrëveshje apo do të ndryshojmë sistemin për të shkuar te ai që kishim para vitit 2008. Të gjitha palët po testojnë veten e vetë, për shembull opozita a arrin dot të mbledhë një numër të madh qytetarësh për shkak të pakënaqësisë ndaj qeverisë. Testi i parë do të jetë 16 marsi”, ka thënë Afrim Krasniqi./Opinion.al
