Ambasada e Shteteve të Bashkuara në Kosovë ka konfirmuar për Radion Evropa e Lirë se janë anuluar ftesat për 14 pjesmarrës nga Kosova në tetë programe të Qendrës Evropiane për Studime të Sigurisë “George Marshall”.
“Ambasada e SHBA-ve mund të konfirmojë se ftesat për 14 pjesëmarrësit nga Kosova në tetë programe që fillojnë në mars dhe zgjasin deri në shtator janë anuluar” thuhet në përgjigjen e ambasadës së SHBA-së.
Kjo masë pason anulimin e vizitës së gjeneralit amerikan të Gardës Nacionale të Iowas, Timothy Orr në Kosovë, si shenjë të pakënaqësisë me vendimin e Qeverisë së Kosovës, për vendosjen e taksës në produktet e Serbisë dhe Bosnjë e Hercegovinës.
Shtetet e Bashkuara kërkojnë nga qeveria e Kosovës të pezullojë taksën ndaj mallrave serbe dhe të Bosnjës. Por kryeministri i Kosovës, Ramush Haradinaj e kundërshton heqjen e taksës. Ai deklaroi sërisht të premten se ajo nuk do të hiqet derisa Serbia ta njohë Kosovën.
“Edhe ne kemi dëshirë ta largojmë këtë taksë, nesër do ta kishim bërë një të tillë sikur të na njihte Serbia, por nuk bën të na vendosen kushte, pasi që nuk parashihet të shkojmë në dialog me kushte”, tha Haradinaj gjatë një vizite në komunën e Mamushës./E.M
