Gjatë intervistës për “Deutsche Welle”, Presidenti Ilir Meta ka folur edhe për mundësinë e ndryshimit të kufijve mes Kosovës dhe Serbisë. Meta ka thënë se kjo gjë duhet të bëhet vetëm me mirëkuptimin dhe marrëveshjen mes Shteteve të Bashkuara të Amerikës dhe Bashkimit Europian, ku rol kyç luan Gjermania.
“Besoj se edhe në këtë rast, bashkëpunimi midis SHBA-ve dhe BE-së, por këtu dua të jem edhe më pak specifik sikurse kam qenë edhe në të gjitha takimet me drejtuesit e Kosovës, bashkëpunimi midis SHBA-ve dhe Gjermanisë do të ishte mjaft i rëndësishëm që të kemi sa më shpejt një marrëveshje, që jo vetëm garanton paqen dhe sigurinë afatgjatë në rajon, por njëkohësisht garanton të ardhmen europiane të të dyja vendeve, si të Serbisë, ashtu edhe të Kosovës. Dhe një garanci në këto momente më mirë se Gjermania vështirë ta japë dikush tjetër”, është shprehur Meta.
Aktualisht, në lidhje me këtë çështje, Gjermania është shprehur kundër ndryshimeve të kufijve në Ballkan, ndërsa SHBA ka deklaruar se mirëpret një marrëveshje mes Kosovës dhe Serbisë.
Gjatë intervistës të zhvilluar në Berlin, Meta është pyetur se ç’mendim ka në lidhje me dhënien e nënshtetësisë shqiptare për shtetasit e Kosovës, me qëllim lëvizjen e lirë në zonën Shengen.
“Kjo nuk është një zgjidhje për arsye, sepse Shqipëria, edhe pse ka përfituar prej kohësh liberalizimin e vizave përsëri është në vrojtim, është në monitorim të respektimit të detyrimeve që vijnë nga kjo e drejtë e fituar, që kuptohet edhe mund të ndërpritet në një moment të caktuar. Pra, nuk është kjo zgjidhja. Qytetarët e Kosovës kanë pasaportat e tyre, kanë shtetin e tyre, që njihet nga 23 vende të BE-së dhe kanë marrë një premtim. Dhe ka kaluar koha që ky premtim të mbahej, pasi liberalizimi i vizave ka qenë një proces teknik dhe ata i kanë plotësuar më shumë se të gjitha vendet e tjera, përfshirë edhe Shqipërinë në të kaluarën, pra në Ballkanin Perëndimor, detyrimet dhe kushtet teknike”, ka thënë Ilir Meta.
