Administrata e presidentit Donald Trump ka njoftuar se do të tërheqë mbrapsh financimin prej 929 milionë dollarësh që i ka dhënë shtetit të Kalifornisë për ndërtimin e trenit të shpejtë që do të lidhë Los Angeles me San Francisco.
Ky njoftim u dha nga Ministria e Transporteve të Shteteve të Bashkuara të Amerikës. Vendimi vjen një ditë pasi Kalifornia dhe pesëmbëdhjetë shtete të tjera paditën administratën Trump për shkak të shpalljes së gjendjes së jashtëzakonshme, me qëllim mbledhjen e fondeve për ndërtimin e murit me Meksikën. Gjashtëmbëdhjetë shtetet argumentuan se paratë që do të jepnin për murin me Meksikën, do të anulonin shumë projekte infrastrukturore.
“New York Times” raporton se Ministria e Transporteve po vlerëson edhe marrjen mbrapsh të 2,5 miliardë dollarëve fonde federale. “Nuk është rastësi që ky kërcënim i administratës vjen 24 orë pas aksionit ligjor kundër emergjencës kombëtare”, ka thënë Guvernatori i Kalifornisë Gavin Newsom, duke e quajtur kërkesën për fonde thjesht politike.
