42-vjeçari Armando Sulejmani, të cilit ditën e diel iu bë atentat, është vënë në pranga. Siç mëson Opinion.al, ai është arrestuar për armëmbajtje pa leje. Po ashtu mësohet se pas atentatit, ku plumbat iu morrën jetën Arjan Hasanir dhe Orest Hoxhës, Armando Sulejmani, i njohur edhe me nofkën “Çipuri” ka shkuar me një automjet privat në spital.
Janë shoqëruar gjithsej dhe 15 persona, të cilët pasi u morën në pyetje u lanë të lirë. Bëhet fjalë për persona që kanë qenë dëshmitarë në vendin e ngjarjes apo të tjerë që mendohet se kanë pasur konflikte me viktimat dhe të plagosurin. Në vendin e ngjarjes, thotë policia, u gjetën më shumë se 25 gëzhoja.
42-vjeçari është personazh i njohur i botës së krimit në Vlorë. Në vitin 2016, ai i shpëtoi një tjetër atentati me armë, ku mbeti i plagosur lehtë në krah. Para 3 vitesh “Çipuri” kishte dalë nga qelia pasi ka qenë i dënuar për vrasje me 20 vite burg. Ai njihet si anëtar i bandës së Gaxhait.
Mesditën e së dielës, Armando Sulejmani ishte pasagjer në makinën Volkswagen që u qëllua me breshëri kallashnikovi tek “Uji i Ftohtë”, në Vlorë. Në fshatin Babicë u gjet një makinë e djegur dhe dy kallashnikovë brenda saj që dyshohet të jenë përdorur nga atentatorët.
