Rudina Hajdari prej kohësh është jo në një linjë më qëndrimet e Partisë Demokratike. Edhe për protestën e së shtunës ajo ka dalë kundër reagimeve që u bënë nga njerëz të partisë, ndërsa thekson se “një protestë e sukseshme nuk duhet të ketë dhunë në asnjë rast”.
“Qytetarët e Shqipërisë kanë shumë të drejtë dhe arsye të protestojnë kundër keq-qeverisjes, kriminalitetit, abuzimit shtetëror, autoritarizmit, papunësisë, padrejtësisë, diskriminimit, mos-zhvillimit .. etj. Por mënyra sesi ne protestojmë dhe qëndrimet që ne mbajmë janë tepër të rëndësishme. Çdo akt dhune i ndërmarrë është i papranueshëm dhe jo-legjitim”, mendon deputetja demokrate.
Zonja Hajdari thotë se dhuna nuk e forcon kauzën e drejtë të opozitës, përkundrazi ajo e dobëson atë dhe madje rrezikon misionin dhe objektivat opozitare e demokratike. E për të, protesta që shkërmoqi qeverinë e Edi Ramës ishte ajo e studentëve.
Në fakt “krisja” mes saj dhe drejtuesëve në Partinë Demokratike ka nisur që nga protesta e studentëve. Më pas në një seancë në Kuvend, sa i përket shit-blerjes së votave, ajo deklaroi se jo pa faj është dhe Partia Demokratike.
“Është një faj i përbashkët sepse dhe opozita duhet ta kishte çuar pas zgjedhjeve të 2017 duhet ta kishte ankimuar, ndoshta ne nuk e bëmë këtë sepse nuk kishim besim te drejtësia dhe me të drejtë nuk kishim besim te drejtësia që mund të bënte këtë gjë për sa i përket procedimit penal të disa personave të cilët bënë këtë akt penal”, do të deklaronte zonja Hajdari.
