Prokuroria e Krimeve të Rënda, ka dalë së fundmi në një deklaratë për shtyp, duke mohuar faktin që Lala është një person në hetim për “Zbulimin e akteve dhe të dhënave sekrete”.
Prokuroria shprehet në deklaratë se: “se gazetarja Klodiana Lala nuk është person nën hetim në këtë procedim penal dhe nuk është duke u hetuar nga ky organ procedues. Hetimet janë duke u kryer në lidhje me veprimet dhe mosveprimet e personave të tjerë funksionarë të organeve të drejtësisë, të cilët kanë hartuar aktet e përgjimeve, kanë administruar këto akte dhe kanë patur akses në to, por dhe kushdo tjetër që në bazë të ligjit është njohur me aktet e sipërcituara dhe ka patur detyrimin ligjor për ruajtjen e sekretit hetimor si dhe marrjen e masave të nevojshme për ndalimin e publikimit të akteve të procedimit penal të mësipërm.” Informon Prokuroria e Krimeve të Rënda.
Gazetarja Klodiana Lala është autore e shkrimit të botuar fillimisht në “Birn” dhe më pas transmetuar në “Zërin e Amerikës”, ku zbardhen përgjime mbi blerjen e votave në zgjedhjet parlamentare të vitit 2017. D.l
